Road Accident Deaths in India | ലോകമാകെ റോഡപകട മരണങ്ങൾ കുറയുന്നു, ഇന്ത്യയിൽ കൂടുന്നു; ലോകാരോഗ്യ സംഘടന കണക്ക്

ലോകമാകെ റോഡപകട മരണങ്ങൾ കുറയുമ്പോൾ ഇന്ത്യയിൽ കൂടുകയാണെന്ന് ലോകാരോഗ്യ സംഘടന. റോഡ് സുരക്ഷയെക്കുറിച്ചുള്ള  ഏറ്റവും പുതിയ റിപ്പോർട്ട് അനുസരിച്ച്, 2021 ൽ റോഡപകടങ്ങളിൽ മരിച്ച 100 ൽ 13 പേരും ഇന്ത്യയിൽ നിന്നുള്ളവരാണെന്നാണ് കണക്കുകൾ.  2010 നും 2021 നും ഇടയിൽ തെക്കു കിഴക്കനേഷ്യയിൽ റോഡപകടങ്ങളിൽ 3.3 ലക്ഷം പേർ മരിച്ചുവെങ്കിൽ ഇതിൽ പകുതിയും ഇന്ത്യക്കാരാണ് .

റോഡ് സുരക്ഷയുമായി ബന്ധപ്പെട്ട് ലോകാരോഗ്യ സംഘടന  പുറത്തിറക്കിയ ആഗോള റിപ്പോർട്ടിലാണ് വിവരങ്ങൾ ഉള്ളത് .റോഡപകട മരണങ്ങൾ വർധിച്ച 65 രാജ്യങ്ങളിൽ ഒന്നാണ് ഇന്ത്യ. മരണങ്ങൾ 2010-ൽ 1.3 ലക്ഷത്തിൽ നിന്ന് 2021-ൽ 1.5 ലക്ഷമായി ഉയർന്നു. തെക്കുകിഴക്കൻ ഏഷ്യൻ മേഖലയിൽ സംഭവിച്ച 3.3 ലക്ഷം മരണങ്ങളിൽ 46 ശതമാനവും ഇന്ത്യയിലാണ്.

2021-ൽ ഇന്ത്യൻ സർക്കാർ റോഡപകടങ്ങളിൽ മരിച്ചവരുടെ എണ്ണം നൽകിയിരുന്നു.ഇരകളിൽ ചിലർ അവരുടെ പരിക്കുകളാൽ പിന്നീട് മരണത്തിന് കീഴടങ്ങിയെന്ന് കണക്കാക്കുമ്പോൾ, മൊത്തം മരണസംഖ്യ 2.16 ലക്ഷം ആയിരിക്കുമെന്നാണ് റിപ്പോര്‍ട്ടുകൾ.  റോഡപകട മരണങ്ങളുടെ കാര്യത്തിൽ 174 രാജ്യങ്ങളുടെ പട്ടികയിൽ ഇന്ത്യ ഒന്നാം സ്ഥാനത്ത് തുടരുന്നു.

നിയമങ്ങളും സുരക്ഷാ മാനദണ്ഡങ്ങളും മുന്നോട്ട് കൊണ്ടുപോകുന്നതിൽ ഭയാനകമായ പുരോഗതിയുടെ അഭാവം റിപ്പോർട്ട് വെളിപ്പെടുത്തുന്നു. 2019 ലെ കണക്കനുസരിച്ച്, അഞ്ച് മുതൽ 29 വയസ്സ് വരെ പ്രായമുള്ള കുട്ടികളുടെയും യുവാക്കളുടെയും പ്രധാന കൊലയാളി റോഡ് ട്രാഫിക് അപകടങ്ങളാണ്,  എല്ലാ പ്രായക്കാരെയും പരിഗണിക്കുമ്പോൾ മരണത്തിന്റെ 12-ാമത്തെ പ്രധാന കാരണമാണിത്. ജോലി ചെയ്യുന്ന പ്രായത്തിലുള്ളവരിലാണ് മരണങ്ങളിൽ മൂന്നിൽ രണ്ട് ഭാഗവും സംഭവിക്കുന്നത്.