Bike Accident: വാഹനം പാഞ്ഞുകയറി വിദ്യാർത്ഥികൾക്ക് ദാരുണാന്ത്യം; സംഭവം ബെംഗളൂരുവിൽ

ബെംഗളൂരു: ട്രക്കിലിടിച്ചുണ്ടായ അപകടത്തിൽ ബൈക്ക് യാത്രികരായ മൂന്ന് വിദ്യാർത്ഥികൾക്ക് ദാരുണാന്ത്യം. ബെംഗളൂരു എയർപോർട്ട് റോഡിൽ ചിക്കജാല മേൽപ്പാലത്തിലാണ് അപകടം നടന്നത്. 

അപകടത്തിൽ ഗാന്ധി കൃഷി വിജ്ഞാന കേന്ദ്രത്തിലെ ബിഎസ്‌സി അഗ്രിക്കൾച്ചർ നാലാം വർഷ വിദ്യാർത്ഥികളായ സുചിത്, രോഹിത്, ഹർഷവർദ്ധൻ എന്നിവരാണ് മരിച്ചത്.  പുലർച്ചെ 1:30ഓടെയായിരുന്നു അപകടം. മൂന്നു പേർ സഞ്ചരിച്ച ബൈക്ക് ചരക്കുമായി പോവുകയായിരുന്ന വാഹനത്തിൽ ഇടിക്കുകയായിരുന്നു എന്നാണ് റിപ്പോർട്ട്. 

ബൈക്ക് ഓടിച്ചിരുന്നത് സുചിത്തായിരുന്നു. അമിത വേഗതയിൽ ലയിൻ മാറാൻ ശ്രമിക്കുന്നതിനിടെ അപകടമുണ്ടായെന്നാണ് പോലീസ് പറയുന്നത്. റോഡിലേക്ക് വീണ മൂന്ന് പേരുടെയും ശരീരത്തിൽ മറ്റൊരു വാഹനം കയറിയിറങ്ങിയാണ് മരണം സംഭവിച്ചത്. അപകടത്തിന് ശേഷം ഈ വാഹനം നിർത്താതെ പോവുകയായിരുന്നു. മരിച്ച മൂന്ന് പേർക്കും 21-22 വയസായിരുന്നു. 

അഞ്ച് സുഹൃത്തുക്കൾ ചേർന്ന് ഹോസ്റ്റലിൽ നിന്നും രണ്ട് ബൈക്കുകളിലായി പുറത്തുപോയപ്പോഴാണ് അപകടമുണ്ടായത്.  ഇഹ്‌റിൽ രണ്ട് പേർ മറ്റൊരു ബൈക്കിലായിരുന്നു. സുഹൃത്തിൻറെ ജന്മദിന പാർട്ടിയിൽ പങ്കെടുക്കാനായിരുന്നു ഇവർ പോയതെന്നാണ് റിപ്പോർട്ട്. മരിച്ച വിദ്യാർത്ഥികളുടെ മൃതദേഹം ബി ആർ അംബേദ്കർ ആശുപത്രിയിലേക്ക് മാറ്റിയിട്ടുണ്ട്.