മന്ത്രിയുടെ അകമ്പടി വാഹനമിടിച്ച് എട്ടുവയസുകാരന് ദാരുണാന്ത്യം

ഗോണ്ട: ഉത്തര്‍പ്രദേശില്‍ മന്ത്രി ഓം പ്രകാശ് രാജ്ഭഹറിന്‍റെ അകമ്പടി വാഹനമിടിച്ച് എട്ടു വയസുകാരന്‍ മരിച്ചു. ശനിയാഴ്ച രാത്രിയില്‍ ഗോണ്ട ജില്ലയിലെ കേണല്‍ഗഞ്ച്-പരസ്പൂര്‍ റോഡിലാണ് അപകടമുണ്ടായത്. 
ഗുരുതരമായി പരിക്കേറ്റ കുട്ടിയെ ഉടന്‍ തന്നെ ആശുപത്രിയില്‍ എത്തിച്ചെങ്കിലും മരണം സംഭവിച്ചു. 

റോഡരികില്‍ കളിച്ചുകൊണ്ടിരുന്ന കുട്ടിയെയാണ് അകമ്പടി വാഹനം ഇടിച്ചിട്ടത് മാത്രമല്ല കുട്ടിയെ ഇടിച്ചിട്ടശേഷം വാഹനം നിര്‍ത്താതെ പാഞ്ഞു പോയി എന്നാണ് ഗ്രാമവാസികള്‍ ആരോപിക്കുന്നത്. സംഭവത്തില്‍ പോലീസ് കേസെടുത്ത് അന്വേഷണം ആരംഭിച്ചു. 

മരിച്ച കുട്ടിയുടെ കുടുംബത്തിന് മുഖ്യമന്ത്രി യോഗി ആദിത്യനാഥ് അഞ്ച് ലക്ഷം രൂപ നഷ്ടപരിഹാം പ്രഖ്യാപിച്ചു. ഡിജിപിയോട് ഉടന്‍ റിപ്പോര്‍ട്ട് നല്‍കാനും മുഖ്യമന്ത്രി ആവശ്യപ്പെട്ടിട്ടുണ്ട്.