Malappuram: ഓട്ടോമാറ്റിക് ​ഗേറ്റിൽ കുരുങ്ങി മരിച്ച പേരക്കുട്ടിയെ കാണാനെത്തിയ മുത്തശ്ശി കുഴഞ്ഞുവീണ് മരിച്ചു

മലപ്പുറം: തിരൂർ വൈലത്തൂരിൽ ഒൻപത് വയസുകാരൻ ​ഗേറ്റിൽ കുടുങ്ങി മരിച്ച സംഭവം നാടിനെയാകെ കണ്ണീരിലാഴ്ത്തിയ സംഭവമായിരുന്നു. ഇപ്പോൾ കുട്ടിയുടെ മൃതദേഹം കാണെനെത്തിയ മുത്തശ്ശിയും കുഴഞ്ഞു വീണു മരിച്ചു. കുട്ടിയെ കാണാനായി ആശുപത്രിയിലെത്തിയ ഹൃദയാഘാതത്തെ തുടർന്ന് കുഴഞ്ഞു വീഴുകയായിരുന്നു.  ചെങ്ങണക്കാട്ടിൽ കുന്നശ്ശേരി ആസിയ (55) ആണ് മരിച്ചത്. ആസിയയുടെ മൂത്ത മകനായ അബ്ദുൽ ഗഫൂറിന്റെ മകൻ മുഹമ്മദ് സിനാൻ (9) ആണ് ഓട്ടോമാറ്റിക്ക് ഗേറ്റിന് ഉള്ളിൽ കുടുങ്ങി മരിച്ചത്. കോട്ടക്കൽ സ്വകാര്യ ആശുപത്രി മോർച്ചറിയിൽ മൃതദേഹം സൂക്ഷിച്ചിരിക്കുകയാണ്. ഇന്നലെ വൈകീട്ടാണ് ഓട്ടോമാറ്റിക് ​ഗേറ്റിനുള്ളിൽ കുടുങ്ങി മുഹമ്മദ് സിനാൻ മരിച്ചത്. 

ഇന്നലെ വൈകീട്ട് 4 മണിയ്ക്കാണ് ദാരുണ സംഭവമുണ്ടായത്.  അയല്‍പക്കത്തുള്ള വീടിന്റ വഴിയിലൂടെ കുട്ടി പള്ളിയിലേക്ക് പോകുകയായിരുന്നു. ഈ വഴിയിലൂടെ കുട്ടി സ്ഥികരമായ സഞ്ചരിക്കുന്നതാണ്.  വൈകീട്ടോടെ നാട്ടുകാരാണ് കുട്ടിയെ ഗേറ്റില്‍ കുടുങ്ങിക്കിടക്കുന്നതായി കണ്ടെത്തിയത്. ​ഗുരുതരമായ പരിക്കേറ്റ മുഹമ്മദ് സിനാനെ കോട്ടക്കല്‍ സ്വകാര്യ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായിരുന്നില്ല. കുട്ടി ഗേറ്റിനുള്ളില്‍ എങ്ങനെ കുടുങ്ങിയെന്ന കാര്യം പോലീസ് അന്വേഷിച്ച് വരികയാണ്.