Sexual Assault Case: മുകേഷ്, ജയസൂര്യ തുടങ്ങിയ നടന്മാർക്കെതിരായ കേസുകളിൽ വഴിതിരിവ്; ലൈംഗികാതിക്രമ പരാതികൾ പിൻവലിക്കുന്നതായി നടി

മുകേഷ് ഉൾപ്പെടെയുള്ള നടന്മാർക്കെതിരെ നൽകിയ പരാതി പിൻവലിക്കുന്നുവെന്ന് ആലുവയിലെ നടി. സർക്കാരിൽ നിന്നും പൊലീസിൽ പിന്തുണ ലഭിക്കുന്നില്ലെന്നും കേസുകൾ പിൻവലിക്കണമെന്ന് ആവശ്യപ്പെട്ട് പ്രത്യേക അന്വേഷണ സംഘത്തിന് കത്ത് നൽകുമെന്നും പരാതിക്കാരി പറഞ്ഞു.

തനിക്കെതിരെ ചുമത്തിയ പോക്സോ കേസിന്റെ സത്യം തെളിയിക്കാനും സർക്കാർ തയ്യാറായില്ലെന്ന് നടി ആരോപിച്ചു. മാധ്യമങ്ങളിൽ നിന്ന്  പോലും പിന്തുണ ലഭിക്കാത്തതിനാലാണ് പരാതികൾ പിൻവലിക്കാൻ തീരുമാനിച്ചതെന്ന് നടി പറഞ്ഞു. 

സാമൂഹ്യ മാധ്യമങ്ങളിലെ അധിക്ഷേപം താങ്ങാനാവുന്നില്ലെന്നും. കേസ് അന്വേഷിക്കുന്ന ഉദ്യോഗസ്ഥർ തന്റെ ഫോൺ പോലും എടുക്കുന്നില്ലെന്നും നടി പറഞ്ഞു. സർക്കാരിൽ നിന്ന് ഒരു പിന്തുണയും ലഭിക്കുന്നില്ല. സ‍ർക്കാർ ഇങ്ങനെയെങ്കിൽ സ്ത്രീകൾ പരാതികൾ നൽകില്ലെന്നും നടി കൂട്ടിച്ചേർത്തു. 

ഹേമ കമ്മിറ്റി റിപ്പോർട്ടിന് പിന്നാലെയാണ് നടന്മാരുൾപ്പെടെ ഏഴ് പേർക്കെതിരെ ആരോപണം ഉന്നയിച്ച് നടി രംഗത്തെത്തിയത്. ജയസൂര്യ, മുകേഷ്, മണിയന്‍പിള്ള രാജു, ഇടവേള രാജു, അഡ്വ. ചന്ദ്രശേഖരന്‍, പ്രൊഡക്ഷന്‍ കണ്‍ട്രോളര്‍ നോബിള്‍, വിച്ചു എന്നിവര്‍ക്കെതിരെ ഫേസ് ബുക്ക് പേജിലൂടെയായിരുന്നു ആരോപണം.