Kuwait fire: വീട് എന്ന സ്വപ്‌നം സഫലമാക്കാനാകാതെ അരുണ്‍ ബാബുവിന്റെ വിയോഗം; ഞെട്ടലോടെ ഒരു ഗ്രാമം

തിരുവനന്തപുരം: കോവിഡ് കാലങ്ങള്‍ തകര്‍ത്ത ജീവിതത്തില്‍ നിന്നും കരകയറാന്‍ വിദേശത്ത് മടങ്ങിയെത്തിയ അരുണ്‍ ബാബുവിനെ വിധി അഗ്നിക്കിരയാക്കി. കുവൈറ്റ് ലേബര്‍ ക്യാമ്പിലെ തീപിടിത്തത്തില്‍ അരുണും ഉള്‍പ്പെടുവെന്ന വാര്‍ത്ത നാടറിഞ്ഞതോടെ അക്ഷരാർത്ഥത്തില്‍ ബന്ധുക്കളും സുഹൃത്തുക്കളും വിറങ്ങലിക്കുകയായിരുന്നു. 

എട്ട് വര്‍ഷം മുമ്പ് ഗള്‍ഫിലായിരുന്നെങ്കിലും കോവിഡ് പരന്നതോടെ നാട്ടിലെത്തിയ അരുണ്‍ ബാബു ആറ് മാസം മുമ്പാണ് തിരികെ മടങ്ങിയത്. വിവാഹിതനായ അരുണ്‍ അമ്മയുടെ സഹോദരി ഷീജയുടെ കൂടെയാണ് ഭാര്യയും കുട്ടികളുമായി തമാസിച്ചിരുന്നത്. അവര്‍ തന്നെ വിദേശത്ത് ജോലി തരപ്പെടുത്തികൊടുക്കുകയും ചെയ്തു. തുടര്‍ന്ന് ഭാര്യയെയും പറക്കമുറ്റാത്ത രണ്ട് കുഞ്ഞുങ്ങളെയും ഭാര്യ വിനീതയേയും മക്കളായ പതിനൊന്ന് വയസുകാരി അഷ്ടമി, മൂന്ന് വയസുള്ള അമയ്യ എന്നിവരെ പൂവത്തൂരിലെ വീട്ടില്‍ താമസിപ്പിച്ചതിനു ശേഷം വിമാനം കയറുകയായിരുന്നു. സ്വന്തമായൊരു വീടെന്ന സ്വപ്‌നം സാക്ഷാത്കരിക്കാന്‍ മാത്രമായി യാതനകള്‍ സഹിച്ച് ഗള്‍ഫിലെത്തി ലേബര്‍ ക്യാമ്പില്‍ തങ്ങി ജോലി നോക്കുകയായിരുന്നു അരുണ്‍ ബാബു. അപ്രതീക്ഷിതമായി ഉണ്ടായ തീപിടിത്തം അരുണ്‍ ബാബുവിൻ്റെ ജീവനും അപഹരിച്ചു. 

അരുണ്‍ ബാബുവിന്റെ ജീവിതത്തില്‍ പരാജയങ്ങൾ മാത്രമായിരുന്നു ഉണ്ടായിരുന്നത്. അച്ഛന്റെ വേര്‍പാടും പനി ബാധിച്ച് മരണടഞ്ഞ അനുജത്തിയും അരുണ്‍ ബാബുവിന്റെ ജീവിതത്തിന്റെ താളം തെറ്റിച്ചു. ഇതില്‍ നിന്നെല്ലാം മനസിനെ പാകപ്പെടുത്തി പുതുജീവിതത്തിലേക്ക് കടന്ന് വിദേശത്തു നിന്നും ലഭിക്കുന്ന സാമ്പത്തികത്തില്‍ സ്വന്തം വീട് എന്ന സ്വപ്‌നംമാത്രമായിരുന്നു അരുണ്‍ ബാബുവിന്റെ മനസില്‍. എന്നാല്‍ വിധി തീനാളത്തില്‍ ജീവന്‍ അപഹരിക്കുകയായിരുന്നു. തങ്ങളെ തനിച്ചാക്കി മോഹങ്ങള്‍ ബാക്കിവെച്ചു പോയ ഭര്‍ത്താവിന്റെ വിയോഗത്തില്‍  മക്കളെയും കൊണ്ട് എങ്ങനെ ജീവിതം മുന്നോട്ടു കൊണ്ടുപോകുമെന്ന അങ്കലാപ്പിലാണ് ഭാര്യ വിനിത.