Bus Accident: കെഎസ്ആർടിസിയുമായി മത്സരയോട്ടം; സ്വകാര്യ ബസ് അപകടത്തിൽപ്പെട്ട് നിരവധി പേർക്ക് പരിക്ക്

തിരുവനന്തപുരം: കെ. എസ്.ആർ.ടി.സി ബസുമായി മത്സര ഓട്ടം നടത്തിയ സ്വകാര്യ ബസ് മറിഞ്ഞ് അപകടം. നിയന്ത്രണം വിട്ട സ്വകാര്യ ബസ് ഇലക്ട്രിക് പോസ്റ്റിൽ ഇടിച്ച് നിരവധി പേർക്ക് പരിക്കേറ്റു. സന്ദീപ്(23), ഗോകുൽ ( 27 ), സരസ്വതി (73), സന്ധ്യ (40), വൈഷ്ണവി (10), ജനി (31) എന്നിവരെ  വെഞ്ഞാറമൂട് ഗോകുലം മെഡിക്കൽ  കോളേജിലും ഗുരുതര മായി പരിക്കേറ്റ രണ്ടു പേരെ മെഡിക്കൽ കോളേജിലും പ്രവേശിപ്പിച്ചു. 

മുക്കൂന്നൂരിൽ ഇന്നലെ വൈകിട്ട് 6 മണിക്കാണ് സംഭവം. വെഞ്ഞാറമൂട്ടിൽ നിന്നും ആറ്റിങ്ങലേക്ക് പോയ ശ്രീ ഭദ്ര ബസാണ് അപകടത്തിൽപ്പെട്ടത്. വെഞ്ഞാറമൂട്ടിൽ നിന്നും ഒരു  കെ.എസ്.ആർ.ടിസി ബസുമായി മത്സര ഓട്ടം നടത്തുകയും മുക്കുന്നൂർ ഇറക്കത്തിൽ വച്ച് കെ.എസ്.ആർ.ടിസി യെ ഓവർ ടേക്ക് ചെയ്യുന്നതിനിടയിൽ ഇലക്ട്രിക് പോസ്റ്റ് തകർത്ത് കുഴിയിലേക്ക് പതിക്കുകയായിരുന്നു എന്ന് യാത്രക്കാർ പറയുന്നു. 

വെഞ്ഞാറമൂട് പോലിസ് ഇൻസ്പക്ടർ അനുപ് കൃഷ്ണ, എസ് ഐ ഷാൻ എന്നിവരുടെ നേതൃത്വത്തിൽ പോലീസും, അസി. സ്റ്റേഷൻ ഓഫീസർ അനിൽ കുമാറിന്റ നേതൃത്വത്തിൽ ഫയർ ഫോഴ്‌സും സ്ഥലത്ത് എത്തിയാണ് പരിക്കേറ്റവരെ ആശുപത്രിയിൽ എത്തിച്ചത്.