Car Caught Fire: പുക ഉയരുന്നത് കണ്ട് നാട്ടുകാർ കാർ നിർത്തിച്ചു, പിന്നാലെ കാർ കത്തിയമർന്നു; ഒഴിവായത് വൻ ദുരന്തം

വയനാട്: വയനാട്ടിൽ ഓടിക്കൊണ്ടിരിക്കുന്ന കാറിന് തീപിടിച്ചു. കാർ പൂർണമായും കത്തിനശിച്ചു. യവനാർകുളം ഏറത്ത് ജെസിലിന്റെ സാൻട്രോ കാർ ആണ് കത്തിയത്. തവിഞ്ഞാൽ കഴുക്കോട്ടൂരിലാണ് അപകടം. ആർക്കും പരിക്കില്ല.

യവനാർകുളത്തുനിന്നും മാനന്തവാടിയിലേക്ക് പോകുന്ന വഴിയാണ് സംഭവം. കാറിൽ രണ്ടുപേരാണ് ഉണ്ടായിരുന്നത്. പുക ഉയരുന്നത് കണ്ട് നാട്ടുകാരാണ് വാഹനം നിർത്തിച്ചത്. കാർ പൂർണമായി കത്തി നശിച്ചു. തിങ്കളാഴ്ച വൈകുന്നേരമാണ് സംഭവം ഉണ്ടായത്.

ഓട്ടത്തിനിടയില്‍ കാര്‍ കത്തിനശിച്ചു, കുട്ടികളടക്കം രക്ഷപ്പെട്ടത് തലനാരിഴക്ക്

ഇടുക്കി: ഓടിക്കൊണ്ടിരിക്കെ കാര്‍ കത്തിനശിച്ചു. അടിമാലി കുരങ്ങാട്ടിയിലാണ് ഓടിക്കൊണ്ടിരുന്ന വാഹനത്തിന് തീപിടിച്ചത്. വാഹനത്തില്‍ നിന്ന് പുക ഉയരുന്നത് ശ്രദ്ധയില്‍പ്പെട്ട യാത്രികര്‍ വാഹനത്തില്‍ നിന്ന് ഇറങ്ങി മാറിയതിനാല്‍ വലിയ അപകടം ഒഴിവായി.

പ്ലാമല റോഡിലാണ് കാർ കത്തിനശിച്ചത്. കോഴിക്കോട് നിന്നുള്ളവര്‍ യാത്ര ചെയ്തിരുന്ന വാഹനമാണ് കത്തിനശിച്ചത്. വാഹനത്തില്‍ നിന്ന് പുക ഉയരുന്നത് കണ്ടതോടെ വാഹനം പാതയോരത്ത് നിര്‍ത്തി യാത്രികര്‍ ഇറങ്ങി മാറി. ഇതിന് പിന്നാലെ തീ ആളി പടരുകയായിരുന്നു.

പ്രദേശവാസികള്‍ വെള്ളമെത്തിച്ച് തീയണച്ചു. വാഹനത്തിന്റെ മുന്‍ഭാഗവും ഉള്‍ഭാഗവും പൂര്‍ണ്ണമായി കത്തിനശിച്ചു. വാഹനത്തില്‍ കുട്ടികളടക്കം ഉണ്ടായിരുന്നു. തീ പടരും മുൻപെ ഇവര്‍ വാഹനത്തില്‍ നിന്ന് ഇറങ്ങി മാറിയതിനാല്‍ വലിയ ദുരന്തം ഒഴിവായി.