പ്രളയകാലത്ത് കേരളത്തെ അവഗണിച്ചിട്ടില്ല; സഹായങ്ങള് എത്തിച്ചുനല്കി: പ്രധാനമന്ത്രി
കേരളത്തിലെ അഞ്ച് മണ്ഡലങ്ങളിലുള്ള ബി.ജെ.പിയുടെ ബൂത്ത് പ്രസിഡന്റുമാരുമായി ഇന്നലെ നടത്തിയ വീഡിയോ കോണ്ഫറന്സിങ് സംവിധാനംവഴി സംസാരിക്കവെയാണ് അദ്ദേഹം ഈ അവകാശവാദം ഉന്നയിച്ചത്.
പത്തനംതിട്ട: പ്രളയകാലത്ത് കേരളത്തെ അവഗണിച്ചിട്ടില്ലെന്നും ആവശ്യമായ സഹായങ്ങള് വിവിധ ഭാഗങ്ങളില്നിന്ന് എത്തിച്ചുനല്കിയിട്ടുണ്ടെന്നും പ്രധാനമന്ത്രി നരേന്ദ്രമോദി പറഞ്ഞു.
കേരളത്തിലെ അഞ്ച് മണ്ഡലങ്ങളിലുള്ള ബി.ജെ.പിയുടെ ബൂത്ത് പ്രസിഡന്റുമാരുമായി ഇന്നലെ നടത്തിയ വീഡിയോ കോണ്ഫറന്സിങ് സംവിധാനംവഴി സംസാരിക്കവെയാണ് അദ്ദേഹം ഈ അവകാശവാദം ഉന്നയിച്ചത്.
സംവാദത്തില് പങ്കെടുക്കുന്നവര്ക്ക് ചോദ്യം ചോദിക്കാനുള്ള അവസരം നല്കിയിരുന്നു. കേരളത്തില് മാറി മാറി ഭരിക്കുന്ന മുന്നണികള് അഴിമതിക്കാരുടെയും ഭരിക്കാന് അറിയാത്തവരുടേയും ആണെന്ന് പ്രധാനമന്ത്രി കുറ്റപ്പെടുത്തി. ബിജെപി പ്രവര്ത്തകര് ക്ഷേമ പ്രവര്ത്തനങ്ങള് ഉള്പ്പെടെ കാര്യക്ഷമമാക്കണമെന്നും ജനങ്ങളില് നിന്ന് പ്രതികരണം ആരായണമെന്നും അദ്ദേഹം നിര്ദ്ദേശിച്ചു.
കേന്ദ്രത്തില് മുന് സര്ക്കാരുകളെക്കാള് മികച്ച ഭരണമാണ് എന്ഡിഎ സര്ക്കാര് കാഴ്ച വെക്കുന്നതെന്ന് അവകാശപ്പെട്ട മോദി, നേരത്തെ വിഐപി എന്ന് വിശേഷിപ്പിച്ചിരുന്ന സ്ഥാനത്ത് ഇപ്പോള് ഇഐപി (എവരി പേഴ്സണ് ഈസ് ഇംപോര്ട്ടന്റ്) എന്ന സ്ഥിതിയാണെന്നും സര്ക്കാര് എല്ലാവരുടേയും ക്ഷേമത്തിനായി പ്രവര്ത്തിക്കുന്നുണ്ടെന്നും പറഞ്ഞു.