Chicken Price: ഉത്പാദന ചെലവ്‌ കൂടുന്നു, ഇറച്ചിക്കോഴി വില ഡബിള്‍ സെഞ്ച്വറിയിലേയ്ക്ക്

Chicken Price: സാധരണക്കാരുടെ അടുക്കള ബജറ്റിന്‍റെ താളം തെറ്റിച്ച് ഇറച്ചിക്കോഴി വില കുതിയ്ക്കുകയാണ്.   പതിവിന് വിപരീതമായി ഈ വര്‍ഷം ചൂടേറിയ മാര്‍ച്ച്‌ മാസത്തില്‍ ചിക്കനെ തൊട്ടാല്‍ കൈപൊള്ളും എന്ന അവസ്ഥയാണ്..  

കഴിഞ്ഞ 2 മാസത്തിനിടെ ഇറച്ചിക്കോഴി വില  164 രൂപയായി.  കോഴിത്തീറ്റയുടെ വില വര്‍ദ്ധിച്ചതും ഉത്പാദനം കുറഞ്ഞതും  സംസ്ഥാനത്ത് പലയിടത്തും ഫാമുകള്‍ പൂട്ടാന്‍ ഇടയായി. ഇതാണ് ഇപ്പോള്‍ ഇറച്ചിക്കോഴി വില ഉയരാന്‍ കാരണം.  തമിഴ്‌നാട് അടക്കമുള്ള  ഇതര സംസ്ഥാനങ്ങളിൽ നിന്ന് കേരളത്തിന്‌ ആവശ്യമായ ഇറച്ചിക്കോഴി എത്തിക്കുകയാണ്.  ഈ സാഹചര്യത്തില്‍ വില ഇനിയും കൂടുമെന്നാണ് കച്ചവടക്കാര്‍ പറയുന്നത്.  

കോഴിത്തീറ്റയ്ക്ക്  കഴിഞ്ഞ 2 മാസത്തിനിടയിൽ 300 രൂപയാണ് ചാക്കൊന്നിന് വര്‍ദ്ധിച്ചത്. വർധിച്ചത്. ശരാശരി 1400-1500 രൂപയുണ്ടായിരുന്ന കോഴിത്തീറ്റയുടെ വില 2460 രൂപയായി ഉയർന്നു. അതുകൂടാതെ, കോഴിക്കുഞ്ഞുങ്ങൾക്കും വില രണ്ടിരട്ടിയിലേറെ കൂടി. 12-15 രൂപയുണ്ടായിരുന്ന കോഴിക്കുഞ്ഞുങ്ങളുടെ വില  42 രൂപയായി. ഇതോടെ കനത്ത ചെലവ് താങ്ങാനാകാതെ ഉത്പാദകര്‍  പലരും പിന്‍വലിഞ്ഞു. 

സാധാരണ മാര്‍ച്ച് മാസത്തില്‍ ഇറച്ചിക്കോഴി വില  കുറയുകയാണ് പതിവ്. എന്നാല്‍ ഇത്തവണ മറിച്ചാണ് സംഭവിക്കുന്നത്‌.  മുന്‍ വര്‍ഷങ്ങളില്‍ ഈ സമയത്ത്  ഇറച്ചിക്കോഴി വില  90 രൂപയായിരുന്നു. രണ്ടു മാസങ്ങള്‍ക്ക് മുന്‍പ് സംസ്ഥാനത്ത് ഇറച്ചിക്കോഴി വില വെറും 98  രൂപയായിരുന്നു.  അതാണ് ഇപ്പോള്‍ 164 -ല്‍ എത്തി നില്‍ക്കുന്നത്.

സംസ്ഥാനത്ത് ഇറച്ചിക്കോഴി വില വര്‍ദ്ധിച്ചതോടെ വ്യാപാരികള്‍ക്കും കനത്ത നഷ്ടമാണ് സംഭവിക്കുന്നത്‌. ശരാശരി ഒരു ക്വിന്റൽ കച്ചവടം നടന്നിരുന്ന കടയിൽ  ഇപ്പോൾ പകുതിയിൽ താഴെ മാത്രമാണ് വില്‍പ്പന നടക്കുന്നത്.  വിലക്കയറ്റവും  കനത്ത ചൂടും ഉത്‌പാദകരെയും വ്യാപാരികളെയും  ഒരേപോലെ ബാധിച്ചിരിയ്ക്കുകയാണ് ...