Monson Mavunkal: മോൻസൺ മാവുങ്കലിന്റെ വീട്ടിൽ മോഷണം; പരാതി നൽകി മകൻ

കൊച്ചി: പുരാവസ്തു തട്ടിപ്പ് കേസ് പ്രതി മോൻസൺ മാവുങ്കലിന്റെ വീട്ടിൽ മോഷണം നടന്നതായി പരാതി. പുരാവസ്തു തട്ടിപ്പ് കേസുമായി ബന്ധപ്പെട്ട്  ക്രൈം ബ്രാഞ്ച് പിടിച്ചെടുത്ത കലൂരിലെ വീട്ടിൽ മോഷണം നടന്നതായി മകൻ മനസ് മോൻസൺ ആണ് പരാതി നൽകിയത്. എറണാകുളം നോർത്ത് പൊലീസിലാണ് മനസ് മോൻസൺ പരാതിപ്പെട്ടിരിക്കുന്നത്.  കഴിഞ്ഞ വെള്ളിയാഴ്ചയാണ് മോഷണം നടന്നതെന്നും. വിലപിടിപ്പുള്ള പല വസ്തുക്കളും നഷ്ടമായതായി സംശയുമുണ്ടെന്ന് മനസ് പരാതിയിൽ പറയുന്നു. 

ഈ വർഷം മാർച്ച് നാലിനാണ് കെ.പി.സി.സി അധ്യക്ഷൻ കെ. സുധാകരനെ രണ്ടാം പ്രതിയും  മോൻസൻ മാവുങ്കൽ ഒന്നാം പ്രതിയും ആക്കി ക്രൈം ബ്രാഞ്ച് കുറ്റപത്രം സമർപ്പിച്ചത്. എറണാകുളം എ.സി.ജെ.എം കോടതിയിലാണ് ക്രൈംബ്രാഞ്ച് കുറ്റപത്രം സമർപ്പിച്ചിരുന്നത്. മൂന്നുപേർ മാത്രമാണു ക്രൈംബ്രാഞ്ച് കോടതിയിൽ സമർപ്പിച്ച ആദ്യഘട്ട കുറ്റപത്രത്തിൽ പ്രതികളായുള്ളത്. കെ. സുധാകരന്റെ അടുത്തയാളായ എബിൻ എബ്രഹാമാണ് കേസിൽ മൂന്നാം പ്രതി.

പുരാവസ്തു ഇടപാടുമായി ബന്ധപ്പെട്ട് നിരവധി ആളുകൾ മോൻസനു നൽകിയ 25 ലക്ഷം രൂപയിൽ പത്തു ലക്ഷം കൈപറ്റിയെന്നാണ് സുധാകരനെതിരായ കേസ്. ഇതിൽ തെളിവുകൾ കണ്ടെത്തിയതിന് പിന്നാലെ സുധാകരനെ അറസ്റ്റ് ചെയ്യുകയുമുണ്ടായി. മുൻകൂർ ജാമ്യമുണ്ടായതിനാൽ പിന്നീട് വിട്ടയയ്ക്കുകയായിരുന്നു. കൂടുതൽ പ്രതികൾക്കെതിരെ അടുത്ത കുറ്റപത്രത്തിൽ  കുറ്റം ചുമത്തുമെന്നാണ് ക്രൈംബ്രാഞ്ച് വ്യക്തമാക്കിയിരിക്കുന്നത്. മുൻ ഡി.ഐ.ജി എസ്. സുരേന്ദ്രൻ, ഐ.ജി ലക്ഷ്മണയെയും അറസ്റ്റ് ചെയ്തിരുന്നു. മുൻകൂർ ജാമ്യത്തെ തുടർന്നു വിട്ടയയ്ക്കുകയായിരുന്നു.