Court Verdict: തൃശൂരിൽ റോഡ് നിർമ്മാണത്തിൽ അഴിമതി നടത്തിയ കോൺട്രാക്ടർക്കും എൻജിനീയർമാർക്കും നാല് വർഷം കഠിനതടവും പിഴയും ശിക്ഷ

തൃശൂർ: റോഡ് നിർമ്മാണത്തിൽ അഴിമതി നടത്തിയ കോൺട്രാക്ടർക്കും എൻജിനീയർമാർക്കും കഠിനതടവ് ശിക്ഷ വിധിച്ചു. നാല് വർഷം വീതം കഠിന തടവും 20,000 രൂപ പിഴയുമാണ്‌ ശിക്ഷ വിധിച്ചത്. തൃശൂർ ജില്ലാ പഞ്ചായത്തിന് കീഴിൽ വരുന്ന ആളൂർ ഡിവിഷനിൽപ്പെട്ട ചിലങ്ക-അരീക്ക റോഡ് പുനർ നിർമാണത്തിലാണ് അഴിമതി കണ്ടെത്തിയത്.

പണി നടത്തിയ കോൺട്രാക്ടർ ടി ഡി ഡേവിസ്, അസിസ്റ്റന്റ് എഞ്ചിനീയർ മെഹറുന്നിസ, അസിസ്റ്റന്റ് എക്സിക്യൂട്ടീവ് എഞ്ചിനീയർ റൂഖിയ എന്നിവരെയാണ് തൃശൂർ വിജിലൻസ് കോടതി ശിക്ഷിച്ചത്. 2006ൽ ആണ് കേസിന് ആസ്പദമായ സംഭവം. തൃശൂർ ജില്ലാ പഞ്ചായത്തിന്റെ പദ്ധതിയിൽ ഉൾപ്പെടുത്തിയാണ് റോഡ്‌ അറ്റകുറ്റപ്പണിക്കുള്ള തുക അനുവദിച്ചിരുന്നത്.

പ്രതികൾ ഗൂഡാലോചന നടത്തി, നിശ്ചയിച്ച അളവിൽ സാമഗ്രികൾ ചേർക്കാതെയും, രേഖകളിൽ കൃത്രിമം കാണിച്ചും സർക്കാരിന് 1,08,664 രൂപയുടെ നഷ്ടം വരുത്തി എന്നായിരുന്നു കേസ്. വിജിലൻസ്‌ ഇൻസ്‌പെക്ടർ രാമകൃഷ്ണൻ അന്വേഷണം പൂർത്തിയാക്കിയ കേസിൽ വിജിലൻസ്‌ ഡിവൈഎസ്പി ആയിരുന്ന ജ്യോതിഷ്കുമാർ ആണ് കുറ്റപത്രം സമർപ്പിച്ചത്. വിജിലൻസിന് വേണ്ടി പ്രോസിക്യൂട്ടർ ഇആർ സ്റ്റാലിൻ ഹാജരായി.