Counterfeit notes: എടിഎമ്മിൽ കള്ളനോട്ട് നിക്ഷേപിച്ചു; രണ്ട് പേർ അറസ്റ്റിൽ

തിരുവനന്തപുരം: പൂവച്ചൽ എടിഎമ്മിനുള്ളിൽ കള്ളനോട്ട് നിക്ഷേപിച്ച സംഭവത്തിൽ രണ്ട് പേർ അറസ്റ്റിൽ. ആര്യനാട് പറണ്ടോട് കീഴ്പാലൂർ സ്വദേശി ബിനീഷ്, പറണ്ടോട് മുള്ളൻകല്ല് സ്വദേശി ജയൻ എന്നിവരെയാണ് കാട്ടാക്കട പോലീസ് അറസ്റ്റ് ചെയ്തത്.

ബിനീഷിൻ്റെ വലിയകലുങ്ക്  വീട്ടിൽ നിന്നും പോലീസ് പ്രിൻ്റർ കണ്ടെടുത്തു. ഇയാളുടെ അമ്മയുടെ പേരിലുള്ള അക്കൗണ്ടിലേക്കാണ് 500ന്റെ 8 വ്യാജ നോട്ടുകൾ പൂവച്ചൽ എസ്ബിഐ ശാഖയിലെ സി ഡി എമ്മിൽ നിക്ഷേപിച്ചത്. തുടർന്ന് ബാങ്ക് അധികൃതരുടെ പരിശോധനയിൽ നോട്ടു കണ്ടെത്തുകയായിരുന്നു. ശേഷം ബാങ്ക് മാനേജർ സിസിടിവി ദൃശ്യങ്ങൾ പരിശോധിച്ചപ്പോഴാണ് സംശയാസ്പദമായ നിലയിൽ ദൃശ്യങ്ങൾ കണ്ടത്.
കാട്ടാക്കട പോലീസിൽ പരാതി നൽകിയതിനെ തുടർന്നാണ് പ്രതികളെ പ്രിൻ്റർ അടക്കം വീടുകളിൽ നിന്ന് കാട്ടാക്കട പോലീസ് അറസ്റ്റ് ചെയ്തത്.

സ്കൂളിന് സമീപത്ത് നിന്ന് കൂറ്റൻ പെരുമ്പാമ്പിനെ പിടികൂടി 

തിരുവനന്തപുരം: പാലോട് വനം റെയിഞ്ച് പ്രദേശത്തെ കുറുപുഴയിൽ എൽ.പി. സ്കൂളിന് മുന്നിൽ നിന്നും കൂറ്റൻ പെരുമ്പാമ്പിനെ ആർ.ആർ.ടി അംഗം ജയപ്രകാശ് പിടികൂടി. ഇന്നലെ രാത്രി എട്ടരയോടെ വാഹന യാത്രക്കാരാണ് പെരുമ്പാമ്പിനെ കണ്ടത്. തുടർന്ന് തൊട്ടടുത്ത വീട്ടുകാരെ അറിയിക്കുകയും പാലോട് ആർ.ആർ.ടി ക്ക് വിവരം കൈമാറുകയുമായിരുന്നു.

പിടികൂടിയത് പത്ത് അടിയിലേറെ നീളവും, പതിനഞ്ച് കിലോയിലേറെ ഭാരവും 8 വയസ്സ് പ്രായവും വരുന്ന ആൺ പെരുമ്പാമ്പിനെ ആണെന്ന് പാമ്പ് പിടുത്തതിന് ശാസ്ത്രീയ പരീശീലനം നേടിയിട്ടുള്ള പാലോട് ആർ.ആർ.ടി അംഗം ജയപ്രകാശ് പറഞ്ഞു. പിടികൂടിയ പാമ്പിനെ സുരക്ഷിതമായ രീതിയിൽ അടുത്ത ദിവസം ഉൾവനത്തിൽ തുറന്ന് വിടുമെന്നും വനം വകുപ്പ് അറിയിച്ചു.