Mayor- KSRTC Driver Disputes: ആര്യ രാജേന്ദ്രൻ - കെഎസ്ആർടിസി ഡ്രൈവർ തർക്കം; യദുവിന്റെ ഹർജി തള്ളി, അന്വേഷണസംഘത്തിന് കോടതിയുടെ നിർദ്ദേശങ്ങൾ

തിരുവനന്തപുരം: മേയർ ആര്യ രാജേന്ദ്രനെതിരെ കെഎസ്ആർടിസി ഡ്രൈവർ യദു സമർപ്പിച്ച ഹർജി തള്ളി. ആര്യ രാജേന്ദ്രനെതിരെ രജിസ്റ്റർ ചെയ്ത കേസിലെ അന്വേഷണത്തിന് കോടതി മേൽനോട്ടം ആവശ്യപ്പെട്ട് സമർപ്പിച്ച ഹർജിയാണ് തള്ളിയത്. തിരുവനന്തപുരം ഒന്നാം ക്ലാസ് മജിസ്ട്രേറ്റ് കോടതിയുടേതാണ് നടപടി. 

കേസ് ശരിയായ ദിശയിൽ മുന്നോട്ട് പോകണമെങ്കിൽ കോടതിയുടെ മേൽനോട്ടം അനിവാര്യമാണെന്നായിരുന്നു ഹർജി. മൂന്നു മാസം കൂടുമ്പോൾ അന്വേഷണ പുരോ​ഗതി  റിപ്പോർട്ട് കോടതിയിൽ ഹാജരാക്കാൻ നിർദ്ദേശിക്കണമെന്നും യദു ആവശ്യപ്പെട്ടിരുന്നു. 

ഹർജി തള്ളിയെങ്കിലും അന്വേഷണ സംഘത്തിന് നിർദ്ദേശങ്ങൾ നൽകി. ഈ നിർദ്ദേശങ്ങൾ പാലിക്കാൻ അന്വേഷണ സംഘം പ്രത്യേകം ശ്രദ്ധിക്കണമെന്നും കോടതി പറഞ്ഞു. യദുവിന്റെ ഹര്‍ജിയിലെ ഒന്നും രണ്ടും പ്രതികളായ ആര്യാ രാജേന്ദ്രനും ഭര്‍ത്താവ് സച്ചിന്‍ദേവ് എംഎല്‍എയും സാക്ഷികളെ സ്വാധീനിക്കരുതെന്നും കോടതി നിര്‍ദ്ദേശിച്ചു.

സത്യസന്ധമായ അന്വേഷണം നടക്കണം, സാക്ഷികളുടെ മൊഴികളും ശാസ്ത്രീയ തെളിവുകളും അന്വേഷണസംഘം ശേഖരിക്കണം, ബാഹ്യ ഇടപെടലുകളോ സ്വാധീനത്തിലോ വഴങ്ങരുത്, സമയബന്ധിയമായി അന്വേഷണം പൂർത്തിയാക്കണം എന്നിവയാണ് നിർദ്ദേശങ്ങൾ. 

വിധിയിൽ പ്രതീക്ഷയുണ്ടെന്ന് യദു പ്രതികരിച്ചു. നീതി ലഭിക്കാന്‍ ഒന്നരവര്‍ഷംകൂടി കാക്കേണ്ടിവരും. മേയര്‍ സ്ഥാനമൊഴിയുന്നതുവരെ നീതി ലഭിക്കാന്‍ സാധ്യതയില്ലെന്നും യദു കൂട്ടിച്ചേ‍ർത്തു.