P.Sasi: പി. ശശിക്കെതിരെ അന്വേഷണമില്ല, എഡിജിപിയെ തിരക്കിട്ട് മാറ്റേണ്ട; മുഖ്യമന്ത്രിയുടെ നിലപാട് ശരിവച്ച് സിപിഎം

പിവി അൻവർ എംഎൽഎ ഉന്നയിച്ച ആരോപണങ്ങളിൽ മുഖ്യമന്ത്രിയുടെ പൊളിറ്റിക്കൽ സെക്രട്ടറി പി. ശശിക്കെതിരെ പ്രത്യേക അന്വേഷണമുണ്ടാവില്ല. സിപിഎം സംസ്ഥാന സെക്രട്ടറിയറ്റ് യോഗത്തിലാണ് തീരുമാനം. എഡിജിപി അജിത് കുമാറിനെ തിരക്കിട്ട് ക്രമസമാധാന ചുമതലയിൽ നിന്ന് മാറ്റേണ്ടെന്നും പാർട്ടി വിലയിരുത്തി.

ശശി ഉത്തരവാദിത്വത്തോടെ പ്രവർത്തിക്കുന്നു എന്ന മുഖ്യമന്ത്രിയുടെ നിലപാട് ശരിവച്ച പാർട്ടി എഡിജിപിയെ  ഉടൻ മാറ്റേണ്ട സാഹചര്യമില്ലെന്നും വിലയിരുത്തി.  അൻവറിന്റെ പരാതിയിലും തുടർനടപടി lതൽക്കാലം ഉണ്ടാകില്ല. 

വിജിലൻസ് അന്വേഷണവും ഡിജിപിയുടെ നേതൃത്വത്തിലുള്ള അന്വേഷണവും നടക്കുന്നതിനാൽ ഇതിന്റെയെല്ലാം റിപ്പോർട്ട് വന്നതിന് ശേഷം എഡിജിപിയെ മാറ്റുന്ന കാര്യത്തിൽ നടപടിയെടുക്കാനാണ് പാർട്ടി തീരുമാനം. 

തൃശ്ശൂർ പൂരം കലക്കൽ സംഭവത്തിൽ ആഭ്യന്തര സെക്രട്ടറിയുടെ ശുപാർശയ്ക്ക് അനുസരിച്ച് മറ്റ് നടപടികൾ സ്വീകരിക്കും. സംഭവത്തിൽ തുടരന്വേഷണം പ്രഖ്യാപിക്കുമെന്ന സൂചന ഇന്ന് ചേർന്ന മന്ത്രിസഭായോ​ഗത്തിൽ മുഖ്യമന്ത്രി നൽകിയിരുന്നു. പൂരം കലക്കലിൽ ശക്തമായ നടപടി എടുക്കണെമന്ന് റവന്യൂ മന്ത്രി കെ. രാജൻ മന്ത്രി സഭായോ​ഗത്തിൽ ആവശ്യപ്പെട്ടു.