Protest: പെൻഷൻ മുടങ്ങിയതിൽ വൃദ്ധ ദമ്പതികളുടെ പ്രതിഷേധം; ദയാവധത്തിന് അനുവദിക്കണമെന്ന് ബോർഡ് സ്ഥാപിച്ചു

ഇടുക്കി: പെൻഷൻ മുടങ്ങിയതിൽ അടിമാലിയിൽ വീണ്ടും വൃദ്ധ ദമ്പതികളുടെ പ്രതിഷേധം. ജീവിതം ദുരിതത്തിലായെന്നും ദയാവധത്തിന് അനുവദിക്കണമെന്നും ആവശ്യപ്പെട്ട് വികലാംഗയായ ഓമനയും (63) ഭർത്താവ് ശിവദാസനും ഇവർ നടത്തുന്ന പെട്ടിക്കടക്ക് മുന്നിൽ ബോർഡ് സ്ഥാപിച്ചു.

ഇടുക്കി അടിമാലി അമ്പലപ്പടിക്ക് സമീപമാണ് വൃദ്ധദമ്പതികൾ നടത്തിവന്നിരുന്ന പെട്ടിക്കടയ്ക്ക് മുൻപിൽ ദയാവധത്തിന് തയ്യാറാണെന്ന്  ബോർഡ് സ്ഥാപിച്ചത്. കുളമാക്കുടി സ്വദേശി വികലാംഗയായ 63കാരി  ഓമനയും 72  വയസ്സുള്ള ഭർത്താവ് ശിവദാസനുമാണ് ഇവർ നടത്തിവരുന്ന പെട്ടിക്കടക്ക് മുൻപിൽ ബോർഡ് സ്ഥാപിച്ചത്.

പഞ്ചായത്ത് മുൻപ് അനുവദിച്ചു നൽകിയ പെട്ടിക്കടയിൽ തന്നെയാണ് ഇവരുടെ താമസം. കടയിൽ നിന്നുള്ള ചെറിയ വരുമാനമായിരുന്നു ആകെയുള്ള ജീവിത മാർഗ്ഗം. വരുമാനം ഇല്ലാതായതോടെ സാധനങ്ങൾ വാങ്ങാൻ കഴിയാതെ കച്ചവടവും  നിലച്ചു. മാസങ്ങളായി  പെൻഷൻ ലഭിക്കാത്തതിനാൽ മരുന്നും മുടങ്ങി.

ഭക്ഷണത്തിനും വകയില്ലാതായതോടെയാണ് ദയാവധത്തിന് അനുവദിക്കണമെന്ന് കടക്കുമുന്നിൽ ബോർഡ് സ്ഥാപിച്ചത്. കുളമാക്കുടിയിലുള്ള  സ്ഥലത്ത്  കാട്ടുമൃഗങ്ങളുടെ ആക്രമണം മൂലം കൃഷി സാധിക്കുന്നില്ലെന്ന് ഇവർ പറയുന്നു. മാസങ്ങളായി ക്ഷേമ പെൻഷൻ മുടങ്ങിയതോടെ പട്ടിണിയിലായ നിരവധി വയോജനങ്ങളാണ് ഇത്തരത്തിൽ ദുരിതം അനുഭവിക്കുന്നത്.