Antony Raju: തൊണ്ടിമുതൽ കേസ്; ആന്റണി രാജു വിചാരണ നേരിടണമെന്ന് സുപ്രീം കോടതി

തൊണ്ടി മുതൽ കേസിൽ മുൻമന്ത്രിയും ജനാധിപത്യ കേരള കോൺഗ്രസ് നേതാവുമായ ആന്റണി രാജുവിന് തിരിച്ചടി. കേസിലെ ക്രിമിനൽ നടപടി പുന:സ്ഥാപിച്ച സുപ്രീം കോടതി തുടർനടപടിയുമായി മുന്നോട്ട് പോകാമെന്നും ആന്റണി രാജു വിചാരണ നേരിടണമെന്നും വിധിച്ചു. മയക്കുമരുന്ന് കേസിലെ പ്രതിയെ രക്ഷിച്ചുവെന്നാണ് ആന്റണി രാജുവിനെതിരെയുള്ള ആരോപണം. കേസിലെ രണ്ടാം പ്രതിയാണ്. 

ആന്റണി രാജുവിനെതിരായ ക്രിമിനൽ നടപടി ഒഴിവാക്കിയതിൽ കേരള ഹൈക്കോടതിക്ക് തെറ്റ് പറ്റിയതായി  ഹൈക്കോടതി പറഞ്ഞു. പ്രതികൾ അടുത്തമാസം 20നോ അടുത്ത പ്രവ‍ത്തി ദിവസത്തിലോ കോടതിയിൽ ഹാജരാകണം. ഒരു വർഷത്തിനകം വിചാരണ പൂർത്തിയാക്കണമെന്നും ജഡ്ജിമാരായ സി.ടി രവികുമാർ, സഞ്ജയ് കാരോൾ എന്നിവരുടെ ബെഞ്ച് ഉത്തരവിട്ടു. 

അതേസമയം വിധിയിൽ ആശങ്കയില്ലെന്നും വിചാരണ നേരിടാൻ തയ്യാറെന്നും ആന്റണി രാജു പ്രതികരിച്ചു. റിവ്യൂ ഹർജി നൽകും. നിയമം നിയമത്തിന്റെ വഴിക്ക് പോകട്ടെ. അന്തിമ വിജയം തനിക്കെന്നും ആന്റണി രാജു പറഞ്ഞു. 

1990 ഏപ്രിൽ 4ന് തിരുവനന്തപുരം വിമാനത്താവളത്തിൽ ലഹരിമരുന്ന് കേസിൽ പിടിയിലായ ഓസ്ട്രേലിയൻ പൗരൻ ആൻഡ്രൂ സാൽവദോ‍ർ സർവലിയെ ശിക്ഷയിൽ നിന്ന് രക്ഷപ്പെടുത്താൻ തൊണ്ടിമുതലായ അടിവസ്ത്രത്തിൽ കൃത്രിമം കാട്ടിയെന്നാണ് കേസ്. പ്രതിഭാ​ഗം വക്കീലായിരുന്നു ആന്റണി രാജു. 

വിചാരണകോടതിയിൽ ശിക്ഷിക്കപ്പെട്ട പ്രതി, കേസ് ഹൈക്കോടതിയിൽ എത്തിയപ്പോൾ കുറ്റ വിമുക്തനായി. പാകമാകാത്ത അടിവസ്ത്രമാണ് തെളിവായി ഉണ്ടായിരുന്നത്. കോടതിയിൽ സൂക്ഷിച്ചിരുന്ന തൊണ്ടിമുതലിൽ കൃത്രിമം നടത്തിയെന്ന് ചൂണ്ടിക്കാട്ടി അന്വേഷണ ഉദ്യോ​ഗസ്ഥൻ പരാതി നൽകിയതോടെയാണ് ആന്റണി രാജുവും കോടതി ജീവനക്കാരനായ ജോസും പ്രതികളായത്.