Ratheesh Thiruvangan: നാടൻപാട്ട് കലാകാരൻ രതീഷ് തിരുവരംഗൻ വാഹനാപകടത്തിൽ മരിച്ചു

ഷൊര്‍ണൂര്‍: കുളപ്പുള്ളി ഐപിടി കോളേജിന് സമീപം ടാങ്കര്‍ ലോറിയും ഓട്ടോറിക്ഷയും കൂട്ടിയിടിച്ചുണ്ടായ അപകടത്തിൽ നാടന്‍പാട്ട് കലാകാരന്‍ മരിച്ചു. ഫോക്ലോര്‍ അവാര്‍ഡ് ജേതാവുകൂടിയായ ഓട്ടോ ഡ്രൈവര്‍ കൂറ്റനാട് വാവന്നൂര്‍ കുന്നത്തേരി രതീഷ് തിരുവരങ്കനാണ് മരിച്ചത്. അപകടം നടന്നത് ഇന്നലെ വൈകുന്നേരം  അഞ്ചരയോടെ ആയിരുന്നു.  

പട്ടാമ്പി ഭാഗത്തേക്ക് പോകുകയായിരുന്നു രതീഷ് ഓടിച്ചിരുന്ന ഓട്ടോറിക്ഷ എതിരേവന്ന ലോറിയില്‍ ഇടിച്ചാണ് അപകടമുണ്ടായതെന്നാണ് റിപ്പോർട്ട്. രതീഷിന്റെ മൃതദേഹം ഒറ്റപ്പാലം താലൂക്ക് ആശുപത്രിയിലേക്ക് മാറ്റിയിട്ടുണ്ട്. അപകടത്തെ തുടര്‍ന്ന് പാലക്കാട്-ഗുരുവായൂര്‍ പാതയില്‍ കുറച്ചുനേരത്തേക്ക് ഗതാഗതം തടസ്സപ്പെട്ടു. 

പിന്നീട് ഷൊര്‍ണൂര്‍ പോലീസ് സ്ഥലത്തെത്തി വാഹനങ്ങള്‍ നീക്കുകയായിരുന്നു. 20 വര്‍ഷമായി നാടന്‍പാട്ട് രംഗത്തുള്ള രതീഷിന് കേരള സാംസ്‌കാരിക വകുപ്പിന്റെ വജ്രജൂബിലി പുരസ്‌കാരം, വേദവ്യാസ പുരസ്‌കാരം, സംസ്ഥാന സര്‍ക്കാരിന്റെ ഫോക്ലോര്‍ പുരസ്‌കാരം, കലാഭവന്‍മണി ഓടപ്പഴം പുരസ്‌കാരം തുടങ്ങി നിരവധി അവാര്‍ഡുകള്‍ ലഭിച്ചിട്ടുണ്ട്.  നാടൻപാട്ട് മാത്രമല്ല ഇടയ്ക്ക, ചെണ്ട എന്നിവയിലും പ്രാഗത്ഭ്യം തെളിയിച്ചിട്ടുണ്ട്.

പുതിയ തലമുറയിലെ കുട്ടികള്‍ക്ക് നാടന്‍ കലാപരിശീലനം നല്‍കുന്നതിനായി വിവിധ പരിശീലന, പഠന കേന്ദ്രങ്ങളും അദ്ദേഹം തുടങ്ങിയിരുന്നു. രതീഷിന്റെ അച്ഛന്‍ രാഘവന്‍ ഗുരുപൂജാ അവാര്‍ഡും ഫോക്ലോര്‍ അവാര്‍ഡും നേടിയിട്ടുണ്ട്.