വിദേശ വനിതയുടെ കൊലപാതകം: പ്രതികളെ ഇന്ന് കോടതിയിൽ ഹാജരാക്കും
തിരുവനന്തപുരം: വിദേശവനിത കൊല്ലപ്പെട്ട സംഭവത്തില്‍ അറസ്റ്റിലായ പ്രതികളെ ഇന്ന് കോടതിയില്‍ ഹാജരാക്കും. നെയ്യാറ്റിന്‍കര മജിസ്‌ട്രേറ്റ് കോടതിയിലാണ് ഹാജരാക്കുന്നത്.
വാഴമുട്ടം സ്വദേശികളായ ഉമേഷ്‌, ഉദയന്‍ എന്നിവരെയാണ് പോലീസ് ഇന്നലെ കേസുമായി ബന്ധപ്പെട്ട് അറസ്റ്റ് ചെയ്തത്. പ്രതികളെ കസ്റ്റഡിയിൽ വാങ്ങി തെളിവെടുക്കാനായി പൊലീസ് അപേക്ഷ നൽകും.
മാർച്ച് 14ന് കോവളത്തെത്തിയ യുവതിയെ തന്ത്രപരമായി പൊന്തക്കാട്ടിലെത്തിക്കുകയും ലഹരിമരുന്ന് നല്‍കി ബോധം കെടുത്തി പീഡിപ്പിച്ച ശേഷം കൊലപെടുത്തുകയുമായിരുന്നു. കൊലപാതകം, ബലാത്സംഗം, ലഹരിവസ്‍തുക്കള്‍ ഉപയോഗിക്കൽ എന്നിവയാണ് പ്രതികള്‍ക്കെതിരെ ചുമത്തിയിരിക്കുന്ന വകുപ്പുകള്‍.
അതേസമയം, ഇവര്‍ നേരത്തെയും കണ്ടല്‍ക്കാട്ടിലെത്തിച്ച് സ്ത്രീകളെ പീഡിപ്പിച്ചതായി അന്വേഷണസംഘത്തിനു തെളിവ് ലഭിച്ചതിനെ തുടര്‍ന്ന് ആ കേസുകള്‍ അന്വേഷിക്കാനായി പ്രത്യേകം കേസെടുക്കാനും പോലീസ് തീരുമാനിച്ചിട്ടുണ്ട്. കോവളത്തും പരിസരത്തുമായുള്ള എട്ട് സ്ത്രീകള്‍ ഇവര്‍ക്ക് ഇരകളായെന്നാണ് കണ്ടെത്തല്‍.