ADM Naveen Babu Death: എഡിഎം നവീൻ ബാബുവിന്റെ മരണം: തെളിവുകൾ സംരക്ഷിക്കാനുള്ള കുടുംബത്തിന്റെ ഹർജിയിൽ വിധി ഇന്ന്

മുൻ കണ്ണൂർ എഡിഎം നവീൻ ബാബുവിന്റെ മരണവുമായി ബന്ധപ്പെട്ട് കുടുംബം നൽകിയ ഹർജിയിൽ കോടതി ഇന്ന് വിധി പറയും. കേസിൽ തെളിവുകൾ സംരക്ഷിക്കണമെന്ന് ആവശ്യപ്പെട്ട് നവീൻ ബാബുവിന്റെ ഭാര്യ കെ. മഞ്ജുഷയാണ് ഹ‍ർജി നൽകിയത്. കണ്ണൂ‍ർ ഫസ്റ്റ് ക്ലാസ് കോടതിയാണ് വിധി പറയുന്നത്.

മുൻ ജില്ലാ പഞ്ചായത്ത് പ്രസിഡന്റ് പിപി. ദിവ്യ, ജില്ലാ കളക്ടർ അരുൺ കെ. വിജയൻ, പെട്രോൾ പമ്പ് തുടങ്ങാൻ അപേക്ഷ നൽകിയ ടി.വി പ്രശാന്ത് എന്നിവരുടെ ഫോൺ കോൾ, ടവ‍ർ ലൊക്കേഷൻ  തുടങ്ങിയവ സംരക്ഷിക്കാൻ കോടതി നിർദേശിക്കണമെന്നായിരുന്നു ആവശ്യം. നവീൻ ബാബു താമസിച്ച സ്ഥലത്തേയും റെയിൽവേ സ്റ്റേഷനിലെയും സിസിടിവി ദൃശ്യങ്ങൾ  സംരക്ഷിക്കണമെന്നും ഹർജിയിൽ ആവശ്യപ്പെടുന്നു.

രേഖകൾ സംരക്ഷിച്ചില്ലെങ്കിൽ, കേസന്വേഷണം മറ്റേതെങ്കിലും ഏജൻസിയെ ഏൽപ്പിക്കുകയാണെങ്കിൽ തെളിവുകൾ കിട്ടാതാകുമെന്ന് ചൂണ്ടിക്കാട്ടിയാണ് ഹർജി ഫയൽ ചെയ്തത്. സിബിഐ അന്വേഷണം ആവശ്യപ്പെട്ട് കുടുംബം ഹൈക്കോടതിയെ സമീപിച്ചിരുന്നു. 

ആവശ്യമായ തെളിവുകൾ സംരക്ഷിച്ചിട്ടുണ്ടെന്നായിരുന്നു പ്രോസിക്യൂഷന്റെ മറുപടി. എന്നാൽ ഫോൺ നമ്പറുകൾ അപൂർണവും വ്യക്തമല്ലാത്തതുമാണെന്ന് ആരോപിച്ച് പ്രോസിക്യൂഷന്റെ റിപ്പോർട്ട് കുടുംബം തള്ളിയിരുന്നു.  

നവീൻ ബാബുവിന്റെ രണ്ട് ഫോണുകൾ, പിപി ദിവ്യയുടെ ഫോൺ, സിസിടിവി ദൃശ്യങ്ങളുടെ സിഡി, മെമ്മറി കാർഡ് എന്നിവ കഴിഞ്ഞ ദിവസം പൊലീസ് കോടതിയിൽ ഹാജരാക്കി.