Crime News: വീടിന് നേരെ ഗുണ്ടാ ആക്രമണം; വൃദ്ധയെയും കൊച്ചുമകനെയും ആക്രമിച്ചു

തിരുവനന്തപുരം: വെങ്ങാനൂർ വെണ്ണിയൂരിൽ വീടിന് നേരെ ഗുണ്ടാ ആക്രമണം. വീടിന് മുന്നിൽ നിർത്തിയിട്ടിരുന്ന ബൈക്ക് അക്രമികൾ അടിച്ചു തകർത്തു. വെണ്ണിയൂർ സ്വദേശി കൃഷ്ണപ്രസാദിന്റെ വീടിന് നേരെയാണ് വ്യാഴാഴ്ച പുലർച്ചെ ആക്രമണം ഉണ്ടായത്. ബൈക്കിൽ എത്തിയ അഞ്ചം​ഗ സംഘം വീടിന് നേരെ ആക്രമണം നടത്തുകയായിരുന്നു.

സംഭവത്തിൽ കൃഷ്ണപ്രസാദ് വിഴിഞ്ഞം പോലീസിൽ പരാതി നൽകി. വീട്ടിലേക്ക് കല്ലെറിഞ്ഞ് ഭീകരാന്തരീക്ഷം സൃഷ്ടിച്ച ശേഷം വീടിന് മുന്നിൽ പാർക്ക് ചെയ്തിരുന്ന ബൈക്ക് അടിച്ച് തകർക്കുകയായിരുന്നുവെന്ന് പരാതിയിൽ പറയുന്നു. ഭാര്യയെ കളിയാക്കിയത് ചോദ്യംചെയ്തിലും  പോലീസിൽ പരാതി നൽകിയതിലുമുള്ള വൈരാഗ്യമാണ്  വീട് കയറി ആക്രമണം നടത്തിയതിന് പിന്നിലെന്നാണ് കൃഷ്ണപ്രസാദ് പറയുന്നത്.

ബഹളം കേട്ട് വാതിൽ തുറന്ന് പുറത്തിറങ്ങിയ കൃഷ്ണപ്രസാദിന്റെ അമ്മൂമ്മയ്ക്ക് നേരെയും മകനുനേരെയും കല്ലേറുണ്ടായി. പരിസരവാസികൾ എത്തിയപ്പോഴേക്കും അക്രമി സംഘം ബൈക്കിൽ കടന്നു കളഞ്ഞുവെന്ന് വീട്ടുകാർ പോലീസിന് മൊഴി നൽകി.

വിഴിഞ്ഞം പോലീസും ഫോറൻസിക് സംഘവും സ്ഥലത്തെത്തി പരിശോധന നടത്തി. സംഭവത്തെക്കുറിച്ച് അന്വേഷിച്ചു വരികയാണെന്നും, പ്രദേശത്തെ സിസിടിവി ഉൾപ്പെടെ പരിശോധനയ്ക്ക് വിധേയമാക്കുമെന്നും പോലീസ് വ്യക്തമാക്കി.