ADGP Ajith Kumar: എഡിജിപി - ആർഎസ്എസ് കൂടിക്കാഴ്ച; അന്വേഷണ ഉത്തരവിറക്കി സർക്കാർ

എഡിജിപി എംആർ അജിത് കുമാർ ആർഎസ്എസ് നേതാക്കളുമായി കൂടിക്കാഴ്ച നടത്തിയതിൽ അന്വേഷണ ഉത്തരവിറക്കി സംസ്ഥാന സർക്കാർ. ഡിജിപി എസ്. ദർവേഷ് സാഹിബിന് ഇതുസംബന്ധിച്ച ഉത്തരവ് നൽകി. ആരോപണം വന്നതിന് 20 ദിവസങ്ങൾക്ക് ശേഷമാണ് അന്വേഷണ ഉത്തരവ് വരുന്നത്. 

അതേസമയം എഡിജിപിയുടെ സുഹൃത്തും ആർഎസ്എസ് നേതാവുമായ ജയകുമാറിന്റെ മൊഴി രേഖപ്പെടുത്തതിന് അന്വേഷണ സംഘം നോട്ടീസ് നൽകി. എഡിജിപി ജയകുമാറിനൊപ്പമാണ് നേതാക്കളെ സന്ദർശിച്ചതെന്ന റിപ്പോർട്ടിന്റെ അടിസ്ഥാനത്തിലാണ് ജയകുമാറിന്റെ മൊഴി രേഖപ്പെടുത്തുന്നത്. എഡിജിപിക്കൊപ്പം നേതാക്കളെ കണ്ടവരുടെ മൊഴിയും അന്വേഷണ സംഘം രേഖപ്പെടുത്തും.

ആർഎസ്എസ് ജനറൽ സെക്രട്ടറി ദത്താത്രേയ ഹെസബാളെ, ആർഎസ്എസ് നേതാവ് റാം മാധവ് എന്നിവരെയാണ് എഡിജിപി സന്ദർശിച്ചത്. തിരുവനന്തപുരത്തും തൃശ്ശൂരിലും വച്ച് 10 ദിവസത്തെ ഇടവേളയിലാണ് കൂടിക്കാഴ്ച നടന്നത്. വ്യക്തിപരമായ കൂടിക്കാഴ്ച എന്നായിരുന്നു എഡിജിപിയുടെ വിശദീകരണം. 

എന്നാൽ കൂടിക്കാഴ്ച പുറത്ത് വന്നതോടെ പ്രതിപക്ഷവും ഘടകകക്ഷികളും വലിയ വിമർശനങ്ങൾ ഉയർത്തിയിരുന്നു. മുഖ്യമന്ത്രിയുടെ മധ്യസ്ഥനായാണ് എഡിജിപി ആർഎസ്എസ് നേതാക്കളെ കണ്ടതെന്ന് പ്രതിപക്ഷ നേതാവ് ആരോപിച്ചു. ക്രമസമാധാന ചുമതലയിൽ നിന്ന് അജിത് കുമാറിനെ ഒഴിവാക്കണെമെന്ന് സിപിഐ ആവശ്യപ്പെട്ടിരുന്നു. എന്നാൽ അന്വേഷണം കഴിയുന്നത് വരെ ഒരു നടപടിയും എടുക്കില്ലെന്ന് മുഖ്യമന്ത്രി പറഞ്ഞു.

 എഡിജിപിക്കെതിരെ അന്വേഷണം നടത്താത്തതിൽ വിമർശനങ്ങൾ ഉയർന്നിരുന്നു. കഴിഞ്ഞ മുന്നണി യോ​ഗത്തിൽ മുഖ്യമന്ത്രി അന്വേഷണം നടത്തുമെന്ന് പറഞ്ഞിരുന്നെങ്കിലും ഉത്തരവ് ഇറക്കിയിരുന്നില്ല. ത‍‍ൃശ്ശൂർ പൂരം കലങ്ങിയതിൽ എഡിജിപിക്ക് വീഴ്ച പറ്റിയെന്ന് ഡിജിപി എസ്. ദർവേഷ് സാഹിബ് കഴിഞ്ഞ ദിവസം മുഖ്യമന്ത്രിയെ അറിയിച്ചിരുന്നു. കൂടിക്കാഴ്ച സംബന്ധിച്ച് അന്വേഷണം നടത്തണമെന്ന് എം.വിൻസെന്റ് എംഎൽഎയും കോൺ​ഗ്രസും പരാതി നൽകിയിരുന്നു. ഇതിന് പിന്നാലെയാണ് അന്വേഷണത്തിന് സർക്കാർ ഉത്തരവ് നൽകിയത്.