Death: വിവാഹം കഴിഞ്ഞ് 11 മാസം, വർക്കലയിൽ ഒന്നരമാസം ​ഗർഭിണിയായ 19കാരി തൂങ്ങി മരിച്ച നിലയിൽ

തിരുവനന്തപുരം​: ഗർഭിണിയായ യുവതിയെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തി. തിരുവനന്തപുരം വർക്കല പേരേറ്റിൽ കാട്ടിൽ വീട്ടിൽ ലക്ഷ്മി (19) ആണ് മരിച്ചത്. ജനലിൽ തൂങ്ങിമരിച്ച നിലയിലാണ് മൃതദേഹം കണ്ടെത്തിയത്. വർക്കല എസ്പിയുടെ നേതൃത്വത്തിലുള്ള സംഘം സംഭവസ്ഥലത്തെത്തി പരിശോധന നടത്തി. കടയ്ക്കാവൂർ പോലീസ് കേസ് അന്വേഷണം ആരംഭിച്ചു.

ഞായറാഴ്ച വൈകിട്ട് നാല് മണിയോടെയാണ് ലക്ഷ്മിയെ തൂങ്ങിമരിച്ച നിലയിൽ കണ്ടെത്തിയത്. ഭർത്താവ് കിരണിനൊപ്പം മണമ്പൂർ ശങ്കരൻമുക്കിൽ വാടകയ്ക്ക് താമസികകുന്ന വീട്ടിലെ ജനൽ കമ്പിയിൽ തൂങ്ങിമരിച്ച നിലയിലാണ് പെൺകുട്ടിയെ കണ്ടെത്തിയത്. ഭർത്താവ് കിരണിന്റെ കുടുംബവും ഇതേ വീട്ടിലാണ് താമസിച്ചിരുന്നത്. ഓട്ടോഡ്രൈവറായ കിരണുമായി 11 മാസം മുൻപാണ് ലക്ഷ്മിയുടെ വിവാഹം കഴിഞ്ഞത്.

ബിഎ ലിറ്ററേച്ചർ അവസാന വർഷ വിദ്യാർഥിനിയായ ലക്ഷ്മിയുടെ തുടർപഠനവുമായി ബന്ധപ്പെട്ട് ഭർത്താവും വീട്ടുകാരുമായി തർക്കം ഉണ്ടായിരുന്നതായാണ് വിവരം. ഇതേ തുടർന്നുണ്ടായ മനോവിഷമത്തിൽ ആത്മഹത്യ ചെയ്തതാണെന്നാണ് പ്രാഥമിക നി​ഗമനം. ലക്ഷ്മിയുടെയും കിരണിന്റെയും പ്രണയവിവാഹമായിരുന്നു. ഒന്നരമാസം ഗർഭിണിയായിരുന്നു പെൺകുട്ടി. പാരിപ്പള്ളി മെഡിക്കൽ കോളേജിൽ ആർഡിഒയുടെ സാന്നിധ്യത്തിൽ പോസ്റ്റ്മോർട്ടം നടത്തി മൃതദേഹം ബന്ധുക്കൾക്ക് കൈമാറി.