Jasmine Flower Price Hike: മുല്ലപ്പൂവിന് തീവില; കിലോയ്ക്ക് 4000 രൂപയായി ഉയർന്നു

കേരളത്തിൽ മുല്ലപ്പൂവില കുതിച്ചുയരുന്നു. കടുത്ത മഞ്ഞുവീഴ്ച മൂലം പൂക്കളുടെ വരവ് ഗണ്യമായി കുറഞ്ഞത് വിലവർധനയ്ക്ക് കാരണമായി. മുല്ലപ്പൂ കിലോയ്ക്ക് 4000 രൂപയായി ഉയർന്നു. തമിഴ്നാടിന്റെ തെക്കൻ ജില്ലകളിലാണ് മുല്ലപ്പൂ കൃഷി  കൂടുതലായി നടക്കുന്നത്. നവവധുവിന്റെ കാർകൂന്തൽ അലങ്കരിക്കാൻ ഇന്നും മുല്ലപ്പൂവിനെ വെല്ലാൻ മറ്റ് പൂക്കളില്ല. വിവാഹ സീസണും ആഘോഷ കാലവും ആയതിനാൽ പൂവിന്റെ ഡിമാൻഡും കൂടി. വരും ദിവസങ്ങളിൽ ഇനിയും മുല്ലപ്പൂവിന് വില വർധിക്കുമെന്നാണ് കച്ചവടക്കാർ പറയുന്നത്.

ഗുരുവായൂരിൽ എത്തുന്ന തീർത്ഥാടകർ 70 മുതൽ 80 രൂപ നൽകിയാണ് ഒരു മീറ്റർ പൂവ് വാങ്ങിക്കുന്നത്. തമിഴകത്തെ മല്ലി എന്നറിയപ്പെടുന്ന മുല്ലപ്പൂവ്  ഡിണ്ടിഗൽ, മധുര, മൈസൂർ , നെലക്കോട്ട, ശങ്കരൻകോവിൽ എന്നിവിടങ്ങളിൽ നിന്നാണ് കേരളത്തിലേക്ക് എത്തുന്നത്. ഡിസംബർ മാസം തുടക്കം തന്നെ തമിഴ്നാട്ടിൽ തുടർച്ചയായി പെയ്ത മഴയിലും ചുഴലികാറ്റിലും  മുല്ലപ്പൂ കൃഷി നശിച്ചു. ഇതും മുല്ലപ്പൂവിന്റെ വില കൂട്ടാൻ കാരണമായി.

അന്ന് മുല്ലപ്പൂവിന്  4500 രൂപയായിരുന്നു കിലോയ്ക്ക് വില. എന്നാൽ ധനു, മകര മാസത്തിൽ മഞ്ഞിന്റെ കാഠിന്യം വർദ്ധിക്കുന്നതിനാൽ മുല്ലപ്പൂവിന് വളരെയധികം ക്ഷാമമാണുണ്ടാവുക. കാലാവസ്ഥയിൽ ഉണ്ടായ മാറ്റം കാരണം ഉൽപാദനം കുറഞ്ഞതോടെ മുല്ലപ്പൂവിന്റെ വില കുതിക്കുന്നതെന്നും ഇത് കച്ചവടത്തെ വളരെയധികം ബാധിച്ചെന്നും ഗുരുവായൂർ ശ്രീകൃഷ്ണ ഫ്ലവേഴ്സ് ആൻഡ് ഇവൻസ് ഉടമ അജിത്ത് ഗുരുവായൂർ പറഞ്ഞു.