Lok Sabha Election 2024: രാഹുൽ അമേഠിയിൽ? തിരഞ്ഞെടുപ്പിന് മുമ്പ് വ്യക്തമാക്കണമെന്ന് കെ സുരേന്ദ്രൻ

കൽപ്പറ്റ: രാഹുൽ ഗാന്ധി അമേഠിയിൽ നിന്ന് മത്സരിക്കുമെന്ന വാർത്തകൾ പുറത്ത് വന്നതിന് പിന്നാലെ ആഞ്ഞടിച്ച് ബിജെപി സംസ്ഥാന അധ്യക്ഷനും വയനാട് മണ്ഡലത്തിലെ എൻഡിഎ സ്ഥാനാർത്ഥിയുമായ കെ.സുരേന്ദ്രൻ. ഇക്കാര്യത്തിൽ വ്യക്തത വരുത്താൻ കോൺഗ്രസും രാഹുൽ ഗാന്ധിയും തയ്യാറാകണമെന്ന് കെ.സുരേന്ദ്രൻ ആവശ്യപ്പെട്ടു. 

കഴിഞ്ഞ തവണ വന്നപ്പോൾ വയനാട് തൻ്റെ വീടാണ് എന്നാണ് രാഹുൽ ഗാന്ധി പറഞ്ഞത്. വീട് ഇടക്കിടെ മാറുമോ? അത് വയനാട്ടിലെ ജനങ്ങളോട് പറയാനുള്ള ബാധ്യത രാഹുൽ ഗാന്ധിയ്ക്ക് ഉണ്ട്. വയനാട്ടിലെ തിരഞ്ഞെടുപ്പ് നടക്കും മുമ്പ് തന്നെ അത് വ്യക്തമാക്കണം. സത്യസന്ധനായ രാഷ്ട്രീയക്കാരനാണെങ്കിൽ അമേഠിയിൽ നിന്ന് മത്സരിക്കുന്ന കാര്യം വയനാട്ടുകാരോട് പറയാൻ തയ്യാറാകണമെന്ന് കെ. സുരേന്ദ്രൻ ആവശ്യപ്പെട്ടു.

കാസർ​ഗോഡ് യുഡിഎഫ് സ്ഥാനാർത്ഥി രാജ്മോഹൻ ഉണ്ണിത്താന് വേണ്ടി അറബിയിൽ ചുവരെഴുത്ത്

കാസ‍ർ​ഗോഡ്: കാസർഗോഡ് ലോക്സഭാ മണ്ഡലത്തിലെ യുഡിഎഫ് സ്ഥാനാർത്ഥി രാജ്മോഹൻ ഉണ്ണിത്താന് അറബിയിൽ ചുവരെഴുത്ത്. പയ്യന്നൂരിലാണ് വ്യത്യസ്തമായ ഈ പ്രചരണ രീതി പ്രത്യക്ഷപ്പെട്ടത്. അറബി എഴുത്തിന്റെ ദൃശ്യങ്ങൾ ഇതിനോടകം സാമൂഹിക മാധ്യമങ്ങളിൽ വൈറലാണ്.

പയ്യന്നൂരിൽ തായനേരിയിലും, വെള്ളൂരിലുമാണ് അറബി ഭാഷയിലെ ചുവരെഴുത്ത് പ്രത്യക്ഷപ്പെട്ടത്. രാജ്‌മോഹൻ ഉണ്ണിത്താനെ വിജയിപ്പിക്കുക എന്നാണ് അറബിയിൽ കുറിച്ചിരിക്കുന്നത്. സാമൂഹിക മാധ്യമങ്ങളിലും ഈ ചുവരെഴുത്ത് ദൃശ്യങ്ങൾ വൈറലാണ്. എൽഡിഎഫ് സ്ഥാനാർത്ഥിക്ക് വേണ്ടിയും മണ്ഡലത്തിലുടനീളം ചുവരെഴുത്തുകൾ പ്രത്യക്ഷപ്പെട്ടിട്ടുണ്ടെങ്കിലും അറബി ഭാഷയിലെ പ്രചരണം പുതിയൊരു പരീക്ഷണം തന്നെയായി മാറി.