Malayalam Mission: മലയാളം മിഷൻ മാതൃഭാഷാ പുരസ്കാര നേട്ടങ്ങളുമായി കർണാടക ചാപ്റ്റർ
Malayalam Mission: മലയാളം മിഷൻ കർണാടക ചാപ്റ്റർ പ്രസിഡന്റ് കെ. ദാമോദരന്‍ ആണ് മികച്ച ഭാഷാപ്രവര്‍ത്തകര്‍ക്ക് നല്‍കുന്ന ഭാഷാമയൂരം പുരസ്കാരം നേടിയത്.
മലയാളം മിഷന്‍റെ മലയാണ്‍മ 2023 - മാതൃഭാഷ പുരസ്‌കാരങ്ങളിൽ നേട്ടവുമായി കർണാടക ചാപ്റ്റർ. ലോക മാതൃഭാഷ ദിനാചരണത്തിന്റെ ഭാഗമായാണ് മലയാളം മിഷന്‍റെ മലയാണ്‍മ പുരസ്കാരം. ഭാഷാപ്രതിഭ പുരസ്കാരം, ഭാഷാമയൂരം പുരസ്കാരം, ബോധി അധ്യാപക പുരസ്കാരം വിഭാഗങ്ങളിലാണ് നേട്ടം സ്വന്തമാക്കിയിരിക്കുന്നത്. ബംഗളൂരു കേന്ദ്രമായി പ്രവര്‍ത്തിക്കുന്ന ഇന്‍ഡിക് ഡിജിറ്റല്‍ ആര്‍ക്കൈവ് ഫൗണ്ടേഷനാണ് ഭാഷാപ്രതിഭ പുരസ്കാരത്തിന് അര്‍ഹരായത്. മലയാള ഭാഷയെ സാങ്കേതിക സൗഹൃദമാക്കുന്നതിനുള്ള നൂതനാശയങ്ങള്‍ പ്രാവര്‍ത്തികമാക്കുന്ന വ്യക്തികള്‍ക്ക് അല്ലെങ്കില്‍, സ്ഥാപനങ്ങള്‍ക്ക് നല്‍കുന്നതാണ് ഭാഷാപ്രതിഭ പുരസ്കാരം. 25,000 രൂപയും പ്രശസ്തിപത്രവും ആലേഖനം ചെയ്ത ഫലകവുമടങ്ങുന്നതാണ് പുരസ്കാരം. ഷിജു അലക്സ്, ജിസ്സോ ജോസ്, കൈലാഷ് നാഥ് എന്നിവരാണ് ഫൗണ്ടേഷന്റെ ഡയറക്ടര്‍മാര്‍.
രാജ്യത്തിനകത്തും വിദേശത്തുമായി രണ്ടു വിഭാഗങ്ങളിലാണ് ഭാഷാമയൂരം പുരസ്‌കാരവും ബോധി അധ്യാപക പുരസ്‌കാരവും നല്‍കുന്നത്. പ്രവാസലോകത്തെ മികച്ച ഭാഷാപ്രവര്‍ത്തകര്‍ക്ക് നല്‍കുന്ന ഭാഷാമയൂരം പുരസ്കാരം ഇന്ത്യ വിഭാഗത്തില്‍ നേട്ടം സ്വന്തമാക്കിയത് മലയാളം മിഷൻ കർണാടക ചാപ്റ്റർ പ്രസിഡന്റ് കെ. ദാമോദരന്‍ ആണ്. വിദേശവിഭാഗത്തില്‍ ഫിറോസിയ ദിലീഫ് റഹ്‌മാന്‍, റംഷി മുഹമ്മദ് എന്നിവരും പുരസ്കാരത്തിന് അർഹരായി. 25,000 രൂപയും പ്രശസ്തിപത്രം ആലേഖനംചെയ്ത ഫലകവുമടങ്ങുന്നതാണ് പുരസ്കാരം.
അതേസമയം പ്രവാസലോകത്തെ മികച്ച മലയാളം മിഷന്‍ അധ്യാപകര്‍ക്ക് നല്‍കുന്ന ബോധി അധ്യാപക പുരസ്കാരത്തിന് കര്‍ണാടക ചാപ്റ്ററില്‍ നിന്നുള്ള അധ്യാപികയായ മീര നാരായണന്‍ പ്രത്യേക ജൂറി പരാമര്‍ശം നേടി. 10,000 രൂപയും പ്രശസ്തിപത്രം ആലേഖനംചെയ്ത ഫലകവുമടങ്ങുന്നതാണ് പുരസ്കാരം. ഇതിൽ ഇന്ത്യ വിഭാഗത്തില്‍ പി. രാധാദേവിയും (തമിഴ്നാട് ചാപ്റ്റര്‍), വിദേശ വിഭാഗത്തില്‍ പ്രീത നാരായണനും (അബൂദബി ചാപ്റ്റര്‍) പുരസ്കാരത്തിന് അർഹരായി. 25,000 രൂപയും പ്രശസ്തിപത്രം ആലേഖനംചെയ്ത ഫലകവുമടങ്ങുന്നതാണ് പുരസ്കാരം.
ഈ വര്‍ഷം മുതലാണ് ഭാഷാമയൂരം പുരസ്‌കാരവും ബോധി അധ്യാപക പുരസ്‌കാരവും ഏർപ്പെടുത്തിയത്. മലയാളം മിഷന്‍ നടത്തുന്ന ഭാഷാപ്രവര്‍ത്തനങ്ങള്‍ക്ക് നേതൃത്വം നല്‍കുന്ന ഭാഷാപ്രവര്‍ത്തകര്‍ക്കും അധ്യാപകര്‍ക്കുമുള്ള പുരസ്കാരങ്ങളാണിത്. മികച്ച മലയാളം മിഷന്‍ ചാപ്റ്ററിനുള്ള കണിക്കൊന്ന പുരസ്കാരം മലയാളം മിഷന്‍ മുംബൈ ചാപ്റ്ററിന് ലഭിച്ചു. പ്രവാസി മലയാളികള്‍ക്കിടയില്‍ മലയാള ഭാഷയുടെയും സംസ്‌കാരത്തിന്റെയും വ്യാപനം ലക്ഷ്യമിട്ടുള്ള പ്രവർത്തനങ്ങൾക്കാണ് പുരസ്കാരം. ഒരുലക്ഷം രൂപയും പ്രശസ്തിപത്രം ആലേഖനം ചെയ്ത ഫലകവുമടങ്ങുന്നതാണ് പുരസ്കാരം. മികച്ച പ്രവാസിസംഘടനക്ക് നല്‍കുന്ന സുഗതാഞ്ജലി പ്രവാസി പുരസ്കാരം നേടിയത് ഇന്ത്യന്‍ അസോസിയേഷന്‍ ഷാര്‍ജയാണ്. ഒരു ലക്ഷം രൂപയും പ്രശസ്തിപത്രം ആലേഖനംചെയ്ത ഫലകവുമടങ്ങുന്നതാണ് പുരസ്കാരം.
കെ. ജയകുമാര്‍ (ഡയറക്ടര്‍, ഐ.എം.ജി), ഡോ. പി.കെ. രാജശേഖരന്‍ (ഗ്രന്ഥകാരന്‍, നിരൂപകന്‍), ഡോ. സി. രാമകൃഷ്ണന്‍ (അക്കാദമിക വിദഗ്ധന്‍, വിദ്യാകിരണം), മുരുകന്‍ കാട്ടാക്കട (ഡയറക്ടര്‍, മലയാളം മിഷന്‍) എന്നിവര്രായിരുന്നു ജൂറി അംഗങ്ങൾ. കോവളം ക്രാഫ്റ്റ് വില്ലേജില്‍ ഫെബ്രുവരി 21ന് നടക്കുന്ന ലോക മാതൃഭാഷാ ദിനാചരണ പരിപാടിയുടെ ഉദ്ഘാടനവും പുരസ്കാര വിതരണവും മുഖ്യമന്ത്രി പിണറായി വിജയന്‍ നിര്‍വഹിക്കും. ഫെബ്രുവരി 19 മുതൽ 22വരെ മലയാണ്‍മ ക്യാമ്പ് നടക്കും. 19നാണ് സുഗതാഞ്ജലി ആഗോള കാവ്യാലാപന മത്സരം ഗ്രാന്‍ഡ് ഫിനാലെയും ഫലപ്രഖ്യാപനവും.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...