Rajendra Arlekar New Kerala Governor: കേരള ഗവർണർക്ക് മാറ്റം; രാജേന്ദ്ര വിശ്വനാഥ് ആര്‍ലേകര്‍ പുതിയ കേരള ഗവര്‍ണര്‍

തിരുവനന്തപുരം: കേരള ഗവർണർക്ക് മാറ്റം. നിലവിലെ ബിഹാർ ഗവർണറായ ആർഎസ്എസ് പശ്ചാത്തലമുളള ബിജെപി നേതാവ് രാജേന്ദ്ര വിശ്വനാഥ് ആര്‍ലേകര്‍ ആണ് പുതിയ കേരള ഗവർണർ. അഞ്ച് വർഷത്തെ കാലാവധി പൂർത്തിയാക്കിയ ആരിഫ് മുഹമ്മദ് ഖാൻ ഇനി ബിഹാർ ഗവർണറാകും.

രാജേന്ദ്ര വിശ്വനാഥ് ആര്‍ലേകര്‍ നേരത്തെ ഗോവ മന്ത്രി സഭയിലടക്കം അംഗമായിരുന്ന.  ആര്‍ലേകര്‍ കേരളത്തിലേക്ക് എത്തുന്നത് ബിഹാറിൽ നിന്നാണ്. പ്രധാനമന്ത്രി നരേന്ദ്രമോദിയുമായി വളരെ അടുത്ത ബന്ധം പുലർത്തുന്ന വ്യക്തിയാണ് ആര്‍ലേകര്‍. ക്രിസ്ത്യൻ പശ്ചാത്തലമുളള ഗോവയിൽ നിന്നും കേരളത്തിലേക്കുളള രാജേന്ദ്ര വിശ്വനാഥ് ആര്‍ലേകറിന്റെ വരവിലൂടെ ബിജെപി ലക്ഷ്യമിടുന്നത് ക്രിസ്ത്യൻ വിഭാഗത്തെയാകാമെന്നാണ് വിലയിരുത്തുന്നത്. 

ആരിഫ് മുഹമ്മദ് ഖാനെ അടുത്ത വർഷം തിരഞ്ഞെടുപ്പ് നേരിടുന്ന ബിഹാറിലേക്കാണ് മായിരിക്കുന്നത്. സെപ്റ്റംബർ 5 ന് ആരിഫ് മുഹമ്മദ് ഖാൻ കേരളാ ഗവർണർ പദവിയിൽ അഞ്ച് വർഷം പൂർത്തിയാക്കിയിരുന്നു. സംസ്ഥാന സർക്കാരും ഗവർണ്ണർ ആരിഫ് ഖാനും തമ്മിലെ ഭിന്നത തുടരുന്നതിനിടെയാണ് ഈ മാറ്റം എന്നത് ശ്രദ്ധേയം.  

ഇതിനിടയിൽ ആഭ്യന്തര കലാപം രൂക്ഷമായ മണിപ്പൂരിലും പുതിയ ഗവർണറെ നിയമിച്ചു. ആഭ്യന്തര സെക്രട്ടറി അജയ് കുമാർ ഭല്ലയെയാണ് മണിപ്പൂർ ഗവർണറായി നിയമിച്ചത്. ഈ വർഷം ആഗസ്റ്റ് വരെ കാലാവധിയുണ്ടായിരിക്കെയാണ് ഈ മാറ്റം.  മിസോറാം ഗവർണർ ഡോ ഹരി ബാബുവിനെ ഒഡിഷ ഗവർണറായും ജനറൽ വികെ സിംഗിനെ മിസോറാം ഗവർണറായും നിയമിച്ചിട്ടുണ്ട്. അഞ്ച് സംസ്ഥാനങ്ങളിലെ ഗവർണർമാർക്കാണ് മാറ്റം ഉണ്ടായിരിക്കുന്നത്.