Lok Sabha Election 2024: വയനാട്ടില്‍ ആനി രാജ; തൃശൂരില്‍ വി എസ് സുനില്‍കുമാര്‍; സിപിഐ സ്ഥാനാര്‍ത്ഥികളെ പ്രഖ്യാപിച്ചു

തിരുവനന്തപുരം: വരുന്ന ലോക്സഭാ തിരഞ്ഞടുപ്പിൽ സിപിഐ സ്ഥാനാർത്ഥികളെ പ്രഖ്യാപിച്ചു. നാല് സീറ്റുകളിലും സ്ഥാനാർത്ഥികളായി. തിരുവനന്തപുരത്ത് പന്ന്യൻ രവീന്ദ്രൻ മത്സരിക്കും. തൃശൂരിൽ വി എസ് സുനിൽകുമാർ, വയനാട്ടിൽ ആനി രാജ എന്നിങ്ങനെയാണ് അങ്കത്തിന് ഇറങ്ങുന്നത്. മാവേലിക്കരയിൽ സി എ അരുൺകുമാർ ആണ് സ്ഥാനാർത്ഥി. മാവേലിക്കരയിൽ ജില്ല കൗൺസിലിൻ്റെ എതിർപ്പ് മറികടന്നാണ് അരുൺകുമാറിനെ തീരുമാനിച്ചത്.  ചിറ്റയം ഗോപകുമാർ ഉൾപ്പെടെ മൂന്നു പേരുടെ സാധ്യത സ്ഥാനാർത്ഥി പട്ടിക സിപിഐ കൊല്ലം ജില്ലാ കൗൺസിൽ തയ്യാറാക്കിയിരുന്നു. 

സിപിഐ സംസ്ഥാന നേതൃത്വം പരിഗണിച്ച അഡ്വ. സി. എ.അരുൺകുമാറിനെ പരിഗണിക്കാതെയും ഉൾപ്പെടുത്താതെയുമായിരുന്നു കൊല്ലം ജില്ലാ കൗൺസിൽ യോഗം സംസ്ഥാന നേതൃത്വത്തിന് പട്ടിക നൽകിയത്. പട്ടിക പൂർണമായും തളളിയാണ് അരുൺകുമാറിനെ സ്ഥാനാർത്ഥിയാക്കിയത്. സിഎ അരുൺ കുമാർ സിപിഐ ആലപ്പുഴ ജില്ലാ കൗൺസിലിൽ അംഗമാണ്. എഐവൈഎഫ് സംസ്ഥാന കമ്മിറ്റി അംഗവും മന്ത്രി പി. പ്രസാദിൻ്റെ അഡിഷണൽ പ്രൈവറ്റ് സെക്രട്ടറിയുമാണ് അരുൺ. സംസ്ഥാന കൗൺസിലിന് ശേഷമാണ് ബിനോയ് വിശ്വം സ്ഥാനാർത്ഥികളെ പ്രഖ്യാപിക്കുന്നത്.

അതേസമയം വയനാട്ടിൽ രാഹുൽഗാന്ധി സ്ഥാനാർത്ഥിയായി വരില്ലേ, ആനിരാജയും രാഹുൽ ഗാന്ധിയും ദേശീയ രാഷ്ട്രീയത്തിൽ ബിജെപിയെ നേരിടുന്നവരാണല്ലോ, രാഷ്ട്രീയ- വ്യക്തിപരമായ സൗഹൃദത്തെ ഇത് ബാധിക്കുമോയെന്ന മാധ്യമപ്രവർത്തകരുടെ ചോദ്യത്തിന് സിപിഐ സംസ്ഥാന സെക്രട്ടറി ബിനോയ് വിശ്വത്തിന്റെ മറുപടി ഇങ്ങനെയായിരുന്നു. 

രാഹുൽഗാന്ധിയോട് സ്നേഹബന്ധമുണ്ട്, രാഷ്ട്രീയ സ്നേഹവുമുണ്ട്. ഇന്ത്യ മുന്നണിയിൽ രാഹുൽ നൽകിയ സംഭാവനകളെ ബഹുമാനിക്കുന്നു. കോൺഗ്രസ് പോലൊരു പാർട്ടി രാഹുൽ ഗാന്ധിയെ വയനാട്ടിലേക്ക് മത്സരിപ്പിക്കുമ്പോൾ കഴിഞ്ഞതവണ മുന്നോട്ടുവച്ച ചില രാഷ്ട്രീയ ചോദ്യങ്ങൾക്ക് രാഷ്ട്രീയപരമായി മറുപടി പറയേണ്ടി വരും. യുക്തിഭദ്രമായ തീരുമാനമാണോയെന്ന് അവർ പരിശോധിക്കട്ടെയെന്നും ബിനോയ് വിശ്വം പറഞ്ഞു.