കുർമ്പാച്ചി മലയിൽ കുടുങ്ങിയ ബാബുവിന്റെ അമ്മയും അനിയനും ട്രെയിൻ തട്ടി മരിച്ച നിലയിൽ

പാലക്കാട്: കുർമ്പാച്ചി മലയിൽ കുടുങ്ങി വാർത്തകളിൽ ശ്രദ്ധ നേടിയ ബാബുവിന്റെ മാതാവും സഹോദരനും ട്രെയിൻ തട്ടി മരിച്ച നിലയിൽ. മലമ്പുഴ ചെറാട് സ്വദേശികളായ റഷീദ, ഷാജി എന്നിവരാണ് മരിച്ചത്. പാലക്കാട് കടുക്കാംകുന്നിന് സമീപത്തായാണ് ഇരുവരെയും മരിച്ച നിലയില്‍ കണ്ടെത്തിയത്. അപകടത്തിന് പിന്നിലുള്ള കാരണം വ്യക്തമല്ല.  

2022 ഫെബ്രുവരിയിലാണ് ബാബു മലമ്പുഴ കുർമ്പാച്ചി മലയിൽ കുടുങ്ങിയത്. 45 മണിക്കൂറിലേറെ നീണ്ട രക്ഷാപ്രവര്‍ത്തനത്തിന് ഒടുവിലായിരുന്നു ഇന്ത്യൻ ആർമിയുടെ നേതൃത്വത്തിൽ ബാബുവിനെ രക്ഷപ്പെടുത്തിയത്. സംരക്ഷിത വനമേഖലയില്‍ അതിക്രമിച്ച്‌ കടന്നതിന് അന്ന് ബാബുവിനെതിരെ കേസെടുത്തിരുന്നു. ഇതിനിടയിൽ പല വിധത്തിലുള്ള കേസുകളിലും ബാബു പ്രതിയായിരുന്നു. 

വീട്ടില്‍ അതിക്രമിച്ച്‌ കയറി ഭീഷണിപ്പെടുത്തിയെന്ന പരാതിയിലും ബാബു അറസ്റ്റിലായിരുന്നു. ഡിസംബറിലായിരുന്നു ഇത്. കാനിക്കുളത്ത് ബാബുവിന്റെ ബന്ധുവീട്ടിൽ  കടന്ന് ഭീഷണിപ്പെടുത്തുകയും വീടിനുള്ളില്‍ ഉണ്ടായിരുന്ന ഉപകരണങ്ങള്‍ക്ക് ഉള്‍പ്പെടെ കേടുപാടുകള്‍ വരുത്തുകയും ചെയ്തു. വീട്ടിലെ ഗ്യാസ് സിലിണ്ടര്‍ തുറന്ന് വിട്ട് പരിഭ്രാന്തി പടര്‍ത്തിയ ബാബുവിനെ പരാതിയുടെ അടിസ്ഥാനത്തിൽ കസബ പോലീസ് അറസ്റ്റ് ചെയ്തിരുന്നു.