C.P. Moideen arrested: കബനി ദളം കൊഴിയുന്നു; മാവോവാദി നേതാവ് സി.പി. മൊയ്തീൻ എ.ടി.എസിന്റെ പിടിയിൽ

ആലപ്പുഴ: മാവോവാദി നേതാവ് സി.പി. മൊയ്തീൻ പിടിയിൽ. തീവ്രവാദവിരുദ്ധ സേനയാണ് (എ.ടി.എസ്) ഇയാളെ അറസ്റ്റ് ചെയ്തത്. ആലപ്പുഴ കെ.എസ്.ആർ.സി ബസ് സ്റ്റാന്‍ഡില്‍ നിന്നാണ് മൊയ്തീൻ എ.ടി.എസിന്റെ വലയിലായത്. 

കബനി ദളത്തിലെ അവശേഷിക്കുന്ന കണ്ണിയായ സി.പി മൊയ്തീൻ കഴിഞ്ഞ ദിവസം അങ്കമാലിയിലെത്തിയതായി വിവരം ലഭിച്ചിരുന്നു. തുടർന്ന്, ഇയാൾ മറ്റൊരിടത്തേക്ക് മാറിയതായും വിവരമുണ്ടായിരുന്നു. ഇതേ തുടർന്ന് ആലപ്പുഴയിലും എറണാകുളത്തുമടക്കം വ്യാപകമായ തിരച്ചിലാണ് സേന നടത്തിയത്. സി.പി. മൊയ്തീന്റെ നേതൃത്വത്തിൽ നാല് പേർ മാത്രമായിരുന്നു പേര്യ-ആറളം-കൊട്ടിയൂർ വനമേഖലകളിൽ കഴിഞ്ഞിരുന്നത്. 

നേരത്തെ, കബനി ദളത്തിലെ മറ്റു രണ്ടു മാവോവാദികൾ എ.ടി.എസിന്റെ പിടിയിലായിരുന്നു. സോമൻ, മനോജ് എന്നിവരെയാണ് എ.ടി.എസ് പിടികൂടിയത്. ജൂലായ് 18ന് കൊച്ചിയിൽ നിന്നാണ് മനോജ് പിടിയിലായത്. 27-ന് ഷൊർണൂരിൽ നിന്ന് സോമനും  വലയിലാകുകയായിരുന്നു. സംഘത്തിലുണ്ടായിരുന്ന സന്തോഷ് എന്നയാൽ ഇപ്പോഴും ഒളിവിൽ കഴിയുകയാണ്. ഇയാൾ കോയമ്പത്തൂരിൽ ഉണ്ടെന്നാണ് സൂചന. 

നിലവിൽ സംസ്ഥാനത്ത് കബനി ദളത്തിന്റെ ഭാഗമായി പ്രവർത്തിക്കുന്നത് മൊയ്തീൻ മാത്രമാണെന്ന് പോലീസ് സ്ഥിരീകരിച്ചിരുന്നു. വയനാട് സ്വദേശിയായ ജിഷയാണ് കേരളത്തിൽ നിന്നുള്ള മറ്റൊരംഗം. ഇവർ കർണാടകയിലെ വിരാജ്പേട്ട കേന്ദ്രീകരിച്ച് പ്രവർത്തിക്കുന്ന വിക്രം ഗൗഡയുടെ സംഘത്തിലാണുള്ളത്. പോലീസ് - തീവ്രവാദ വിരുദ്ധസേനയുമായി നിരന്തരമായി ഏറ്റുമുട്ടലുകളുണ്ടായതോടെയാണ് വിവിധ ദളങ്ങളുടെ പ്രവർത്തനം നിലച്ചത്. ഇതിന് പുറമെ, പല മാവോവാദികളും കീഴടങ്ങൽ പുനരധിവാസത്തിന് തയ്യാറാകുകയും ചെയ്തിരുന്നു. ഇവരുടെ പക്കൽ നിന്ന് ലഭിച്ച വിവരങ്ങൾ തീവ്രവാദവിരുദ്ധ സേനയ്ക്കും പോലീസിനും സഹായകരമായി.