Shirur Landslide: നദിയിലെ മണ്‍കൂനയ്ക്ക് സമീപം പുതിയ സിഗ്നല്‍; അർജുന്റെ ട്രക്കിന് സമാനമെന്ന് നി​ഗമനം, വ്യക്തതവരുത്തിയശേഷം തിരച്ചില്‍

ബെം​ഗളൂരു: ഷിരൂരിൽ മണ്ണിടിച്ചിലിൽ കാണാതായ മലയാളി ഡ്രൈവർ അർജുന് വേണ്ടിയുള്ള തിരച്ചിൽ തുടരുന്നു. കാണാതായ ട്രക്കിന്റെ നിർണായക സി​ഗ്നൽ ലഭിച്ചതായാണ് പുതിയ വിവരം. ഐബോഡ് ഡ്രോൺ പരിശോധനയിലാണ് ​സി​ഗ്നൽ ലഭിച്ചത്. നദിയിലെ മൺകൂനയ്ക്ക് അരികിൽ നിന്നാണ് പുതിയ സി​ഗ്നൽ ലഭിച്ചത്. ഇത് അർജുന്റെ ട്രക്ക് തന്നെയാണെന്നാണ് നി​ഗമനം.

മുൻപ് നദിയിൽ നിന്ന് മൂന്ന് ​സി​ഗ്നലുകളാണ് ലഭിച്ചത്. ഇവ ട്രക്കിന്റേയും മണ്ണിടിച്ചിലിൽ ഒലിച്ച് പോയ ടവറിന്റേതുമാകാമെന്നാണ് മുൻപുണ്ടായിരുന്ന ​നി​ഗമനം. 60 മീറ്റർ മാറി അഞ്ച് മീറ്റർ താഴ്ചയിലാണ് പുതിയ സി​ഗ്നൽ ലഭിച്ചത്. ട്രക്കും ക്യാബിനും വേർപെട്ടിട്ടില്ലെന്നാണ് പുറത്ത് വരുന്ന വിവരങ്ങൾ. പ്രദേശത്ത് കനത്ത മഴ തുടരുന്നതിനാൽ മുങ്ങൽ വിദ​ഗ്ധർക്ക് നദിയിലേക്ക് ഇറങ്ങാൻ സാധിച്ചിട്ടില്ല.

പുഴയിൽ അടിയൊഴുക്ക് ശക്തമാണ്. ഇതാണ് മുങ്ങൽ വിദ​ഗ്ധർക്ക് നദിയിലേക്ക് ഇറങ്ങാൻ സാധിക്കാത്തതിന് കാരണം. ഇപ്പോൾ നദിയിൽ ഇറങ്ങുന്നത് ഡൈവർമാരുടെ ജീവന് ആപത്താകുമെന്നാണ് നാവികസേനയുടെ വിലയിരുത്തൽ. ഡ്രോൺ ഉപയോ​ഗിച്ചുള്ള ഐബോഡ് സംഘത്തിന്റെ പരിശോധന നിർണായകമാണ്.

വ്യക്തതയുള്ള ചിത്രം ലഭിക്കാനായി വെള്ളത്തിനടിയിൽ പ്രവർത്തിക്കാവുന്ന ക്യാമറ ഉപയോ​ഗിച്ചും ശ്രമം നടത്തുന്നുണ്ട്. രണ്ട് ലോങ് ബൂം എക്സ്കവേറ്ററുകൾ ഉപയോ​ഗിച്ച് പുഴയ്ക്ക് അരികിലെ മണ്ണ് നീക്കിയും പരിശോധന തുടരുകയാണ്. അങ്കോളയിലെ ഷിരൂരിലുണ്ടായ മണ്ണിടിച്ചിലിലാണ് അർജുനെ കാണാതായത്. പതിനൊന്നാം ദിവസമാണ് പരിശോധന തുടരുന്നത്.