Newborn baby unusual disability: നവജാത ശിശുവിന് അസാധാരണ വൈകല്യം; സ്വകാര്യലാബുകൾക്കെതിരെ ഡിഎംഒ റിപ്പോർട്ട്, കുഞ്ഞിനെ വിദഗ്ധ സംഘം പരിശോധിക്കും

ആലപ്പുഴ: അസാധാരണ വൈകല്യവുമായി നവജാത ശിശു പിറന്ന സംഭവത്തിൽ വിദഗ്ധ അന്വേഷണത്തിന് ആരോ​ഗ്യവകുപ്പ് പ്രതിനിധികൾ ഇന്ന് ആലപ്പുഴയിലെത്തും. ആരോ​ഗ്യവകുപ്പ് അഡീഷ്ണൽ ഡയറക്ടറുടെ നേതൃത്വത്തിലുള്ള പ്രത്യേക സം​ഘമാണ് അന്വേഷണം നടത്തുന്നത്. ഇന്ന് രാവിലെ 11 മണിക്ക് ആലപ്പുഴ വണ്ടാനം മെഡിക്കൽ കോളേജിൽ കുട്ടിയെ വിദ​ഗ്ദ പരിശോധനയ്ക്കായി എത്തിക്കാൻ നിർദേശം നൽകി.

അതേസമയം സംഭവത്തിൽ ​സ്വകാര്യ ലാമ്പുകൾക്ക് ​ഗുരുതര വീഴ്ചയുണ്ടായതായി ഡിഎംഒ റിപ്പോർട്ട്. ജില്ലാതലത്തിലുള്ള അന്വേഷണം ആരംഭിച്ചു. സ്‌കാനിങ് സെന്ററിനെപ്പറ്റിയും അന്വേഷണം നടത്തും. അന്വേഷണങ്ങളില്‍ വീഴ്ച കണ്ടെത്തിയാല്‍ കുറ്റക്കാര്‍ക്കെതിരെ കര്‍ശന നടപടി സ്വീകരിക്കുമെന്ന് ആരോഗ്യ വകുപ്പ് മന്ത്രി വീണാ ജോര്‍ജ് ഇന്നലെ പ്രതികരിച്ചിരുന്നു. 

ആലപ്പുഴ കടപ്പുറം സ്ത്രീകളുടെയും കുട്ടികളുടെയും ആശുപത്രിയിലാണ് അസാധാരണ വൈകല്യവുമായി കുഞ്ഞ് പിറന്നത്. സംഭവത്തിൽ നാല് ഡോക്ടർമാർക്കെതിരെ കേസെടുത്തിട്ടുണ്ട്. ഗൈനക്കോളജിസ്റ്റ്മാരായ ഡോ. ഷേർലി, പുഷ്പ എന്നിവർക്കും സ്വകാര്യ ലാബിലെ രണ്ട് ഡോക്ടർമാർക്കുമെതിരെയാണ് കേസെടുത്തത്.

ഗർഭകാലത്തെ സ്കാനിങ്ങിൽ ഡോക്ടർമാർ വൈകല്യം അറിയിച്ചില്ലെന്ന അനീഷ് - സുറുമി ദമ്പതികളുടെ പരാതിയിൽ ആലപ്പുഴ സൗത്ത് പൊലീസാണ് കേസെടുത്തത്. സ്കാനിങ്ങിൽ കുഴപ്പമില്ലെന്നായിരുന്നു ഡോക്ടർമാർ പറഞ്ഞിരുന്നത്. പ്രസവം കഴിഞ്ഞ് നാല് ദിവസത്തിന് ശേഷമാണ് കുഞ്ഞിനെ കാണിച്ചതെന്നും പരാതിയിൽ പറയുന്നു.