Nipah Virus: മലപ്പുറത്ത് നിപ മരണമെന്ന് സംശയം; കോഴിക്കോട്ടെ പ്രാഥമിക പരിശോധനാ ഫലം പോസിറ്റീവ്

മലപ്പുറം: പെരിന്തൽമണ്ണയിൽ കഴിഞ്ഞയാഴ്ച മരിച്ച യുവാവിന് നിപയെന്ന് സംശയം. 23കാരനായ യുവാവ് പനി ബാധിച്ചാണ് മരിച്ചത്. സ്രവ സാംപിൾ കോഴിക്കോട് മെഡിക്കൽ കോളേജിൽ നടത്തിയ നിപ പോസിറ്റീവാണെന്ന് സ്ഥിരീകരിച്ചു. പുണെ നാഷണൽ വൈറോളജി ഇൻസ്റ്റിറ്റ്യൂട്ടിലേക്ക് സാംപിൾ അയച്ചിട്ടുണ്ട്. ഈ ഫലം വന്ന ശേഷമേ സ്ഥിരീകരണം ഉണ്ടാകൂ.

സെപ്തംബർ ഒമ്പതിനാണ് യുവാവ് മരിച്ചത്. പെരിന്തൽമണ്ണയിലെ എംഇഎസ് മെഡിക്കൽ കോളേജിൽ ചികിത്സയിലിരിക്കേയാണ് യുവാവ് മരിച്ചത്. സാംപിൾ ഇന്നലെയാണ് മെഡിക്കൽ കോളേജിൽ എത്തിച്ചത്. മൈക്രോബയോളജി വിഭാ​ഗത്തിൽ നടത്തിയ പിസിആർ പരിശോധനയിൽ ഫലം പോസിറ്റീവായി. തുടർന്ന് സ്ഥിരീകരണത്തിനായി പുണെ നാഷണൽ വൈറോളജി ഇൻസ്റ്റിറ്റ്യൂട്ടിലേക്ക് സാംപിൾ അയച്ചു.

മലപ്പുറം വണ്ടൂർ നടുവത്ത് സ്വദേശിയാണ് യുവാവ്. ബെം​ഗളൂരുവിൽ പഠിക്കുകയായിരുന്നു. കാലിന് അസുഖത്തെ തുടർന്നാണ് നാട്ടിലെത്തിയത്. നാട്ടിലെത്തിയതിന് പിന്നാലെ പനി ബാധിച്ചു. പനി മാറാതെ വന്നതോടെ പെരിന്തൽമണ്ണയിലെ എംഇഎസ് മെഡിക്കൽ കോളേജിൽ പ്രവേശിപ്പിക്കുകയായിരുന്നു. 

പ്രാഥമിക പരിശോധനയിൽ ഫലം പോസിറ്റീവ് ആയതോടെ ജില്ലാ കളക്ടറുടെ അധ്യക്ഷതയിൽ ഉന്നതതല യോ​ഗം ചേരുന്നുണ്ട്. യുവാവിന്റെ റൂട്ട് മാപ്പും കബറടക്ക വിവരങ്ങളും ആരോ​ഗ്യവകുപ്പ് പരിശോധിക്കുകയാണ്. യുവാവിന് പനിക്കൊപ്പം ഛർദ്ദിയും ഉണ്ടായിരുന്നു. ആദ്യം നടുവത്തുള്ള സ്വകാര്യ ക്ലിനിക്കിലും പിന്നീട് വണ്ടൂരുള്ള സ്വകാര്യ ക്ലിനിക്കിലും ചികിത്സയ്ക്കായി യുവാവിനെ കൊണ്ടുപോയിരുന്നു.

എന്നാൽ രോ​ഗം കുറയാതെ വന്നതോടെ പെരിന്തൽമണ്ണയിലെ എംഇഎസ് മെഡിക്കൽ കോളേജിൽ ചികിത്സയിൽ പ്രവേശിപ്പിക്കുകയായിരുന്നു. യുവാവുമായി സമ്പർക്കം പുലർത്തിയ സഹോദരിയെയും സുഹൃത്തിനെയും ആരോ​ഗ്യവകുപ്പ് നിരീക്ഷണത്തിലാക്കി. വണ്ടൂർ തിരുവാലി പഞ്ചായത്തിലാണ് യുവാവിന്റെ വീട് സ്ഥിതിചെയ്യുന്നത്. പ്രദേശത്ത് ആരോ​ഗ്യവകുപ്പ് ജാ​ഗ്രതാ നിർദേശം പുറപ്പെടുവിച്ചു.