Kerala Price Hike: വിലക്കയറ്റത്തിൽ വലഞ്ഞ് ജനം, സഭയിൽ ഉന്നയിച്ച് പ്രതിപക്ഷം; ദേശീയ പ്രശ്നമെന്നും സർക്കാർ ഇടപെടൽ ഉണ്ടാകുമെന്നും ഭക്ഷ്യമന്ത്രി

തിരുവനന്തപുരം: സംസ്ഥാനത്തെ അവശ്യവസ്തുക്കളുടെ വിലക്കയറ്റം സഭയിൽ ഉന്നയിച്ച് പ്രതിപക്ഷം. സാധാരണക്കാരുടെ ജീവിതം ദുസ്സഹമായെന്നും സപ്ലൈ ഇല്ലാത്ത സ്ഥാപനമായി സപ്ലൈകോ മാറിയെന്നും പ്രതിപക്ഷം ആരോപിച്ചു. അവശ്യവസ്തുക്കളുടെ വിലക്കയറ്റം ദേശീയ പ്രശ്നമാണെന്നും വിഷയത്തിൽ സംസ്ഥാന സർക്കാർ കാഴ്ചക്കാരായി നിൽക്കില്ലെന്നും ഇടപെടൽ നടത്തുമെന്നും ഭക്ഷ്യമന്ത്രി ജിആർ അനിൽ മറുപടി നൽകി.

സംസ്ഥാനത്ത് പച്ചക്കറി അടക്കമുള്ള അവശ്യവസ്തുക്കളുടെ വില ക്രമാതീതമായി കൂടിയതിനാൽ ജനജീവിതം ദുസ്സഹമാണെന്നും സഭ നിർത്തിവച്ച് വിഷയം ചർച്ച ചെയ്യണമെന്നുമായിരുന്നു അടിയന്തര പ്രമേയ നോട്ടീസിലെ പ്രതിപക്ഷ ആവശ്യം.

റോജി എം ജോൺ എംഎൽഎയാണ് അടിയന്തര പ്രമേയ  നോട്ടീസ് നൽകിയത്. എന്നാൽ ആവശ്യവസ്തുക്കൾക്ക് ഉത്പാദന സംസ്ഥാനത്തെക്കാൾ വിലക്കുറവാണ് കേരളത്തിലെന്ന് ഭക്ഷ്യമന്ത്രി ജിആർ അനിൽ പറഞ്ഞു. വിലക്കയറ്റം തടയാൻ ഫലപ്രദമായ ഇടപെടലാണ് സംസ്ഥാന സർക്കാർ നടത്തുന്നതെന്നും മന്ത്രി വ്യക്തമാക്കി.

സപ്ലൈകോയെ തകർക്കുന്ന സമീപനം പ്രതിപക്ഷത്തു നിന്നുണ്ടാകുന്നത് ദൗർഭാഗ്യകരമാണെന്ന് മന്ത്രി പറഞ്ഞു. സപ്ലൈകോയ്ക്ക് ആവശ്യമായ പരിഗണന നൽകുന്നുണ്ടെന്ന് ധനമന്ത്രി കെ എൻ ബാലഗോപാൽ വ്യക്തമാക്കി. അതേസമയം, ഇക്കാര്യത്തിൽ കണക്കുകൾ നിരത്തി പ്രതിപക്ഷ നേതാവ് വിഡി സതീശൻ ധനമന്ത്രിക്ക് മറുപടി നൽകി.

കഴിഞ്ഞ വർഷത്തേക്കാൾ 862 കോടി രൂപ കുറവാണ് ഇത്തവണ സപ്ലൈകോ ചെലവാക്കിയതെന്നും സപ്ലൈകോയുടെ ഘാതകരെന്ന് ഈ സർക്കാർ വിലയിരുത്തപ്പെടുമെന്നും വിഡി സതീശൻ പറഞ്ഞു. സ്പീക്കർ എഎൻ ഷംസീർ അടിയന്തര പ്രമേയത്തിന് അനുമതി നിഷേധിച്ചതിനെ തുടർന്ന് പ്രതിപക്ഷം സഭയിൽ നിന്ന് ഇറങ്ങിപ്പോയി.