Progressive Filmmakers Association: മലയാള സിനിമയിൽ ബദൽ സംഘടനയുമായി പ്രവർത്തകർ; ലക്ഷ്യം പുതിയ സിനിമാ സംസ്കാരം

മലയാള ചലച്ചിത്ര രം​ഗത്ത് ബദൽ സംഘടന വരുന്നു. സിനിമ മേഖലയിലെ നവീകരണം ലക്ഷ്യമിട്ട് പ്രോ​ഗ്രസീവ് ഫിലിം മേക്കേഴ്സ് അസോസിയേഷൻ എന്ന പേരിലായിരിക്കും പുതിയ സംഘടന വരിക. ചലച്ചിത്ര പ്രവർത്തകർക്ക് ഇത് സംബന്ധിച്ച കത്ത് നൽകി.

അഞ്ജലി മേനോൻ, ലിജോ ജോസ് പെല്ലിശ്ശേരി, ആഷിക് അബു, രാജീവ് രവി, റിമ കല്ലിങ്കൽ, ബിനീഷ് ചന്ദ്ര എന്നിവർ സംയുക്തമായി പുറത്തിറക്കിയ പ്രസ്താവനയിലാണ് ബദൽ സംഘടനയെ പറ്റിയുളള സൂചനയുള്ളത്.

തൊഴിലാളികളുടെ ശാക്തീകരണം ലക്ഷ്യം വെയ്ക്കുന്ന സംഘടനയിൽ മലയാള സിനിമയിലെ പിന്നണി പ്രവർത്തകരും ഉൾപ്പെടും. പുത്തൻ സിനിമ സംസ്കാരം രൂപപ്പെടുത്തി മലയാള സിനിമയെ നവീകരിക്കുമെന്ന് പ്രസ്താവനയിൽ ചൂണ്ടികാട്ടുന്നു.

മറ്റു വ്യവസായങ്ങളുമായി താരതമ്യം ചെയ്യുമ്പോൾ സിനിമാമേഖല പിന്നിലാണെന്നും ആധുനിക സംവിധാനങ്ങളും നിയമ ചട്ടക്കൂടുകളും കൂട്ടുത്തരവാദിത്തവും ഉൾക്കൊണ്ട് മലയാള ചലച്ചിത്ര മേഖലയെ വർത്തമാനകാലത്തിലേക്ക് കൊണ്ടു വരേണ്ട സമയമാണ് ഇതെന്നും പ്രസ്താവനയിൽ പറയുന്നു. 

സമത്വം, സഹകരണം, സാമൂഹിക നീതി എന്നീ മൂല്യങ്ങളിൽ വേരൂന്നിയ സംഘടന, തൊഴിലാളികളുടെയും നിർമാതാക്കളുടെയും അവകാശങ്ങൾ സംരക്ഷിക്കപ്പെടുന്നുവെന്ന് ഉറപ്പാക്കുകയും സിനിമാ വ്യവസായത്തെ അടുത്ത ഘട്ടത്തിലേക്ക് ഉയർത്തുന്നതിന് പ്രവർത്തിക്കുമെന്നും കത്തിൽ പറയുന്നു.