Arif Mohammed Khan: ‘സംഘിഖാന് സ്വാഗതമില്ല’; ഗവർണർക്കെതിരെ തൊടുപുഴയിൽ കറുത്ത ബാനർ കെട്ടി എസ്എഫ്ഐ

ഇടുക്കി: ഗവർണറുടെ സന്ദർശനത്തിനെതിരെ എൽ.ഡി.എഫ് ഇടുക്കിയിൽ ആഹ്വാനം ചെയ്ത ഹർത്താൽ പൂർണം. ഭൂപതിവ് ഭേദഗതി ബില്ലിൽ ഒപ്പിടാത്ത ഗവർണർക്കെതിരെ രാജ്ഭവന് മുന്നിൽ എൽ.ഡി.എഫ് ജില്ലാ കമ്മിറ്റി പ്രതിഷേധം നടത്തുന്ന ഇന്നു തന്നെ ഗവർണർ ഇടുക്കിയിൽ എത്തുന്നതിനെതിരെ വലിയ പ്രതിഷേധം ഉയർന്നിരുന്നു.

വ്യാപാരി വ്യവസായി ഏകോപന സമിതിയുടെ ഇൻഷുറൻസ് വിതരണ പരിപാടി  ഉദ്ഘാടനം ചെയ്യാനാണ് ഗവർണർ ആരിഫ് മുഹമ്മദ് ഖാൻ ഇടുക്കിയിൽ എത്തുന്നത്. തൊടുപുഴ മർച്ചന്റസ് അസോസിയേഷൻ ഹാളിലാണ് പരിപാടി സംഘടിപ്പിച്ചിരിക്കുന്നത്.

ഗവർണർക്കെതിരെ കരിങ്കൊടി പ്രതിഷേധം നടത്താൻ എസ്.എഫ്.ഐ നീക്കമുണ്ടെന്നും സൂചനയുണ്ട്. തൊടുപുഴ വെങ്ങല്ലൂർ ജങ്ഷനിൽ റോഡിന് കുറുകെ എസ്.എഫ്.ഐ കറുത്ത ബാനർ കെട്ടി. അതേസമയം ഹർത്താൽ പിൻവലിക്കണമെന്ന് വ്യാപാരി വ്യവസായി ഏകോപന സമിതി ആവശ്യപ്പെട്ടു.

ചടങ്ങിന് പോലീസ് സുരക്ഷ ആവശ്യപ്പെട്ടെന്നും വ്യാപാരി വ്യവസായി ഏകോപന സമിതി വ്യക്തമാക്കി. രണ്ടുമണിക്ക് ഇടുക്കിയിൽ നിന്നുള്ള എൽ.ഡി.എഫ് പ്രവർത്തകർ രാജ്ഭവൻ ഉപരോധിക്കും. ഭൂമി-പതിവ് നിയമ ഭേദഗതി ബില്ലില്‍ ഒപ്പ് വയ്ക്കാത്ത ഗവര്‍ണറുടെ നടപടിയില്‍ പ്രതിഷേധിച്ച് ഇടുക്കി ജില്ലാ എല്‍ഡിഎഫ് ഇന്ന് രാജ് ഭവന്‍ മാര്‍ച്ച് നടത്തുന്നുണ്ട്. രണ്ടുമണിക്ക് ഇടുക്കിയിൽ നിന്നുള്ള എൽ.ഡി.എഫ് പ്രവർത്തകർ രാജ്ഭവൻ ഉപരോധിക്കും.