Shibu Baby John: `സുജിത്ത് ദാസിനെ സസ്പെന്റ് ചെയ്യാനുള്ള ധൈര്യം പോലുമില്ല`; മുഖ്യമന്ത്രി ഭീരുവെന്ന് ഷിബു ബേബി ജോൺ

കൊല്ലം: സുജിത്ത് ദാസിനെ സസ്പെന്റ് ചെയ്യാൻ പോലുമുള്ള ധൈര്യം ഭീരുവായ മുഖ്യമന്ത്രിക്ക് ഇല്ലെന്ന് ആർഎസ്പി സംസ്ഥാന സെക്രട്ടറി ഷിബു ബേബി ജോൺ. ചന്ദനം ചാരിയാൽ ചന്ദനം മണക്കും ചാണകം ചാരിയാൽ ചാണകം മണക്കും. ഇതുപോലെയാണ് ശിവശങ്കരനും എംആർ അജിത്ത് കുമാറിൻ്റെയും അവസ്ഥ. സുജിത്ത് ദാസ് കള്ളനെങ്കിൽ കള്ളന് കഞ്ഞി വച്ചവനാണ് മുഖ്യമന്തിയെന്ന് ഷിബു ബേബി ജോൺ പറഞ്ഞു.

കാരാട്ട് റസാഖ്, പി.വി അൻവർ, കെ.ടി ജലീൽ എന്നിവർ ഇടതു സംരക്ഷകരാകുന്ന കാഴ്ചയാണ് കാണുന്നത്. വിഷയത്തിലെ സിപിഐ നിലപാട് അത്ഭുതകരമാണ്. സിപിഐ ഇങ്ങനെ അധപതിക്കരുതെന്നും ഷിബു ബേബി ജോൺ കൊല്ലത്ത് പറഞ്ഞു. അന്വേഷണത്തിൽ നിജസ്ഥിതി പുറത്ത് വന്നാൽ മുഖ്യമന്ത്രി പെടും. മുഖ്യമന്ത്രി രാജിവെക്കണമെന്ന് ആർഎസ്പി ആവശ്യപ്പെടുന്നു.

അൻവറിൻ്റെ ആരോപണത്തിൽ പി ശശിയിലൂടെ ലക്ഷ്യം പിണറായിയെയാണ്. അൻവറുമായുള്ള മുഖ്യമന്ത്രിയുടെ കൂടിക്കാഴ്ച ഒത്തുതീർപ്പിൻ്റെ ഭാഗം മാത്രമാണെന്നും ഷിബു ബേബി ജോൺ ആരോപിച്ചു. കെ.സി വേണുഗോപാലിനെ സംരഷിക്കാൻ എം.ആർ അജിത്ത് കുമാർ ഇടപെട്ടെങ്കിൽ അന്വേഷിക്കട്ടെ എന്നും സർക്കാരിന് എതിരെ ശക്തമായ പ്രക്ഷോഭ പരിപാടികൾക്ക് യുഡിഎഫ് നേതൃത്വം നൽകും എന്നും ഷിബു പറഞ്ഞു. ശ്രീരാമന്  ഹനുമാൻ പോലെയായിരുന്നു ഇ.പി ജയരാജനും പിണറായിയും തമ്മിലുള്ള ബന്ധം. ഇ.പി ജയരാജൻ - പ്രകാശ് ജാവദേക്കറെ കണ്ടത് പിണറായിയുടെ നിർദ്ദേശപ്രകാരമാണന്നും ഷിബു ബേബി ജോൺ പറഞ്ഞു.