Shornur Train Accident: ഷൊര്‍ണൂർ ട്രെയിൻ അപകടം; കാണാതായ ശുചീകരണ തൊഴിലാളിയുടെ മൃതദേഹം കണ്ടെത്തി

പാലക്കാട്: ഷൊര്‍ണൂരിൽ ട്രെയിൻ തട്ടിയുണ്ടായ അപകടത്തിൽ കാണാതായ തമിഴ്നാട് സേലം സ്വദേശി ലക്ഷ്മണന്‍റെ (48) മൃതദേഹം കണ്ടെത്തി. ഭാരതപ്പുഴയിൽ നടത്തിയ തെരച്ചിലിലാണ് വൈകിട്ടോടെ ലക്ഷ്മണന്‍റെ മൃതദേഹം കണ്ടെത്തിയത്. ഇന്നലെ വൈകിട്ട് മൂന്ന് മണിയോടെയാണ് ഡൽഹിയിൽ നിന്ന് തിരുവനന്തപുരത്തേക്ക് പോയ കേരള എക്സ്പ്രസ് ‌തട്ടി ശുചീകരണ തൊഴിലാളികളായ നാലുപേര്‍ മരിച്ചത്. ഇതിൽ മൂന്നുപേരുടെ മൃതദേഹങ്ങൾ ഇന്നലെ തന്നെ ലഭിച്ചിരുന്നു. ലക്ഷമണൻ, വള്ളി, റാണി, എന്നിവരുടെ മൃതദേഹങ്ങളാണ് ഇന്നലെ ലഭിച്ചത്.

ലക്ഷ്മണനായി ഇന്ന് രാവിലെ മുതൽ ഫയര്‍ഫോഴ്സിന്‍റെ സ്കൂബാ ടീം ഉള്‍പ്പെടെ തെരച്ചിൽ നടത്തുകയായിരുന്നു. ഫയര്‍ഫോഴ്സിന്‍റെ സ്കൂബാ ടീമിലെ മുങ്ങല്‍ വിദഗ്ധരാണ് മൃതദേഹം കണ്ടെത്തിയത്. കൊച്ചിൻ പാലത്തിന്‍റെ തൂണിനോട് ചേര്‍ന്നായിരുന്നു ലക്ഷ്മണന്‍റെ മൃതദേഹം കണ്ടെത്തിയത്.

ശുചീകരണ സംഘത്തിൽ 10 പേരാണുണ്ടായിരുന്നത്. ട്രെയിൻ വരുന്നത് കണ്ട് മറ്റ് 6 പേരും ഓടി രക്ഷപ്പെട്ടു. ട്രാക്കിലെ മാലിന്യം ശേഖരിക്കുന്നതിനിടെയാണ് കേരള എക്സ്പ്രസ് തട്ടി അപകടമുണ്ടായത്. ഷൊർണൂർ റെയിൽവെ സ്റ്റേഷൻ കഴിഞ്ഞുള്ള പാലത്തിൽ വെച്ചാണ് അപകടമുണ്ടായത്. ട്രെയിൻ വരുന്നത് കണ്ട് ഓടിരക്ഷപ്പെടാൻ ശ്രമിക്കുന്നതിനിടെ ഇവരെ ട്രെയിൻ ഇടിക്കുകയായിരുന്നു.