Shornur Train Accident: ഷൊർണൂർ ട്രെയിൻ അപകടം; ആര്‍പിഎഫ് അന്വേഷണം തുടങ്ങി, ശുചീകരണ സംഘത്തിലുണ്ടായിരുന്നത് 10 പേർ

പാലക്കാട്: ഷൊര്‍ണൂരിൽ ട്രെയിൻ തട്ടി ശുചീകരണ തൊഴിലാളികള്‍ മരിച്ച സംഭവത്തില്‍ ആര്‍പിഎഫ് അന്വേഷണം തുടങ്ങി. ഡൽഹിയിൽ നിന്ന് തിരുവനന്തപുരത്തേക്ക് വരികയായിരുന്ന കേരള എക്സ്പ്രസ് ട്രെയിൻ ഇടിച്ചാണ് നാല് ശുചീകരണ തൊഴിലാളികൾ മരിച്ചത്. ശുചീകരണ സംഘത്തിൽ 10 പേരാണുണ്ടായിരുന്നത്. ട്രെയിൻ വരുന്നത് കണ്ട് മറ്റ് 6 പേരും ഓടി രക്ഷപ്പെട്ടുവെന്നാണ് വിവരം. 

ട്രാക്കിലെ മാലിന്യം ശേഖരിക്കുന്നതിനിടെയാണ് കേരള എക്സ്പ്രെസ് തട്ടി അപകടമുണ്ടായത്. ഷൊർണൂർ റെയിൽവെ സ്റ്റേഷൻ കഴിഞ്ഞുള്ള പാലത്തിൽ വെച്ചാണ് അപകടമുണ്ടായത്. ലക്ഷമണൻ, വള്ളി, റാണി, ലക്ഷമണൻ എന്നീ ശുചീകണതൊഴിലാളികളാണ് മരണപ്പെട്ടത്. ട്രെയിൻ വരുന്നത് കണ്ട് ഓടിരക്ഷപ്പെടാൻ ശ്രമിക്കുന്നതിനിടെ ട്രെയിൻ ഇടിക്കുകയായിരുന്നു. മൂന്ന് മൃതദേഹങ്ങൾ കണ്ടെടുത്തു. നാലാമത്തെ ആൾക്കായി തിരച്ചിൽ തുടരുകയാണ്. മൃതദേഹങ്ങൾ പാലക്കാട് ജില്ലാ ആശുപത്രിയിലേക്ക് മാറ്റി. ഒരാളുടെ മൃതദേഹം പുഴയിലേക്ക് വീണെന്നാണ് ദൃക്സാക്ഷികള്‍ പറയുന്നത്. മൃതദേഹം കണ്ടെത്താനുള്ള ശ്രമം തുടരുകയാണ്.