flight catches fire: യാത്രക്കാരന്റെ കയ്യിലെ പവർബാങ്ക് പൊട്ടിത്തെറിച്ചു; അബുദാബി-കോഴിക്കോട് വിമാനത്തിൽ തീപിടുത്തം

അബുദാബി: അബുദാബി-കോഴിക്കോട് വിമാനത്തിൽ തീപിടുത്തം. വൻ അപകടം ഒഴിവായത് തലനാരിഴയ്ക്ക്. യാത്രക്കാരന്റെ പക്കലുണ്ടായിരുന്ന പവർ ബാങ്ക് പൊട്ടിത്തെറിച്ചാണ് അപകടം ഉണ്ടായത്. അബുദാബിയിൽ നിന്നും കോഴിക്കോട്ടേക്ക് എയർ അറേബ്യയുടെ വിമാനം ഇന്ന് പുലർച്ചെ  പുറപ്പെടുമ്പോഴാണ് സംഭവം. വിമാനത്തിൽ ഉണ്ടായിരുന്ന യാത്രക്കാർക്ക് അപകടം ഒന്നും സംഭവിച്ചില്ല. പവർ ബാങ്ക് പൊട്ടിത്തെറിച്ച് തീപിടിക്കുകയും എക്‌സിറ്റ് ഡോറുകൾ തുറന്ന് യാത്രക്കാർ പുറത്തിറങ്ങാൻ നിർദ്ദേശം നൽകുകയുമായിരുന്നു. 

തീ പടർന്നതോടെ പവർ ബാങ്ക് ചവിട്ടിപൊട്ടിക്കാനും സഹയാത്രികർ ശ്രമിച്ചു. സംഭവത്തിൽ 4 പേരെ അധികൃതർ തടഞ്ഞു. പവർ ബാങ്ക് കൈയിൽ ഉണ്ടായിരുന്ന മലയാളിയും സഹോദരിയെയുമാണ് തടഞ്ഞു വെച്ചത്. യാത്രക്കാരെ മറ്റൊരു വിമാനത്തിൽ വീടുകളിൽ എത്തിക്കുകയായിരുന്നു. തലനാരിഴയ്ക്കാണ് വലിയൊരു ദുരന്തം ഒഴിവായത്.