Tribal Man Attacked:`രണ്ട് കാലിലും ഉപ്പൂറ്റിയില്ല, പുറമെല്ലാം പോയി`; ആദിവാസി യുവാവിനെ വലിച്ചിഴച്ച കാർ കണ്ടെത്തി

വയനാട്: മാനന്തവാടിയിൽ ആദിവാസി യുവാവിനെ വലിച്ചിഴച്ച സംഭവത്തിൽ കാർ കസ്റ്റഡിയിലെടുത്തു. കണിയാമ്പറ്റയിൽ നിന്നാണ് കാർ കണ്ടെത്തിയത്. പ്രതികളെയും പൊലീസ് തിരിച്ചറിഞ്ഞിട്ടുണ്ട്. പ്രതികളെ ഇന്ന് തന്നെ അറസ്റ്റ് ചെയ്യുമെന്ന് മാനന്തവാടി പൊലീസ് അറിയിച്ചു.

കണിയാമ്പറ്റ സ്വദേശികളായ അർഷിദും നാല് സുഹൃത്തുക്കളുമാണ് പ്രതികൾ. സംഭവത്തിൽ മനുഷ്യവകാശാ കമ്മീഷൻ കേസെടുത്തിട്ടുണ്ട്. 

പ്രതികളെ എത്രയും വേ​ഗം കണ്ടുപിടിക്കാൻ മുഖ്യമന്ത്രി നിർദ്ദേശം നൽകി. പ്രതികൾക്കെതിരെ കർശന നടപടി എടുക്കണമെന്ന് വയനാട് എംപി പ്രിയങ്ക ഗാന്ധിയും ആവശ്യപ്പെട്ടു. 

മാനന്തവാടി പയ്യംമ്പള്ളി കൂടൽ കടവിൽ ചെക്കു ഡാം കാണാനെത്തിയ രണ്ടു സംഘങ്ങൾ തമ്മിലുണ്ടായ സംഘ‍ർഷത്തിൽ ഇടപെട്ട മാതൻ എന്ന യുവാവിനെയാണ് കാറിൽ സഞ്ചരിച്ചവ‍‍‍‍‍ർ റോഡിലൂടെ വലിച്ചിഴച്ചത്.  കല്ലുമായി ആക്രമിക്കാനൊരുങ്ങിയ യുവാവിനെ തടഞ്ഞപ്പോഴാണ് കാറിൽ ഉണ്ടായിരുന്നവർ മാതനെ റോഡിലൂടെ വലിച്ചിഴച്ചത്.

കാറിന്റെ ഡോറിനോട് കൈ ചേർത്ത് പിടിച്ച് അര കിലോമീറ്ററോളം ദൂരം ഇത്തരത്തിൽ മാതനെ വലിച്ചിഴയ്ക്കുകയായിരുന്നു.  അരയ്ക്കും കൈകാലുകൾക്കും സാരമായി പരിക്കേറ്റ മാതൻ മാനന്തവാടി മെഡിക്കൽ കോളേജിൽ ചികിത്സയിലാണ്.