V Sivankutti: എസ്എസ്എൽസി പരീക്ഷയ്ക്ക് നാളെ തുടക്കം; ഒരുക്കങ്ങൾ പൂർത്തിയായതായി വിദ്യാഭ്യാസ മന്ത്രി

തിരുവനന്തപുരം: സംസ്ഥാനത്ത് എസ്എസ്എൽസി പരീക്ഷ നാളെ ആരംഭിക്കുകയാണ്. കേരളത്തിലും ഗൾഫിലും ലക്ഷദ്വീപിലുമായി 2971 പരീക്ഷാ കേന്ദ്രങ്ങളാണുള്ളത്. ആവശ്യമായ ഒരുക്കങ്ങൾ എല്ലാം പൂർത്തിയായതായി വിദ്യാഭ്യാസ മന്ത്രി ശിവൻകുട്ടി അറിയിച്ചു. ഇത്തവണ സംസ്ഥാനത്ത് എസ്എസ്എൽസി പരീക്ഷ എഴുതുന്നത് 4.27 ലക്ഷം വിദ്യാർത്ഥികളാണ്. 2955 കേന്ദ്രങ്ങളാണ് കേരളത്തിൽ മാത്രമുള്ളതെന്നും അടുത്ത അധ്യയന വർഷത്തേക്കുള്ള പാഠപുസ്തകങ്ങളുടെ അച്ചടി പൂർത്തിയായെന്നും വിദ്യാഭ്യാസ മന്ത്രി കൂട്ടിച്ചേർത്തു.

ഇതിനോടകം തന്നേ രണ്ട്, നാല്, ആറ്, എട്ട്, പത്ത് ക്ലാസുകളിലെ പാഠപുസ്തകങ്ങളുടെ അച്ചടി  പൂർത്തിയായി. മെയ് മാസത്തോടെ ഒന്ന്, മൂന്ന്, അഞ്ച്, ഏഴ്, ഒമ്പത് എന്നീ ക്ലാസ്സുകളിലെ പാഠപുസ്തകം വിതരണം ചെയ്യും. അവധിക്കാലത്ത് കുട്ടികൾക്ക് വേണ്ടി പഠനോത്സവം നടത്തും. അത്യാവശ്യ കാര്യങ്ങൾക്ക് വേണ്ടി നാല് കോടി രൂപ സർക്കാർ വിലയിരുത്തിയിട്ടുണ്ടെന്നും വി ശിവൻകുട്ടി വ്യക്തമാക്കി.