Valapattanam robbery: വളപട്ടണത്തെ കവര്‍ച്ച; ലോക്കറിന് ഒരു കേടുംവരുത്താതെ മോഷണം, കവർച്ചയ്ക്ക് പിന്നിൽ കൃത്യമായി അറിവുള്ളയാള്‍

കണ്ണൂർ: കണ്ണൂർ വളപട്ടണത്ത് വ്യാപാരിയുടെ വീട്ടിലെ കവർച്ച കേസിൽ പോലീസ് സംഘം ബെം​ഗളൂരുവിൽ എത്തി അന്വേഷണം ആരംഭിച്ചു. അരിവ്യാപാരി കെപി അഷറഫിന്റെ വീട്ടിലാണ് കവ‍ർച്ച നടന്നത്. വീട്ടിലെ ലോക്കർ വാങ്ങിയത് ബെം​ഗളൂരുവിലെ സ്ഥാപനത്തിൽ നിന്നാണ്. ഈ സ്ഥാപനത്തിലെത്തി പോലീസ് വിവരങ്ങൾ ശേഖരിച്ചു.

താക്കോൽ ഇട്ടതിന് ശേഷം ലിവർ കൃത്യമായി നീക്കിയാൽ മാത്രമേ ലോക്കർ തുറക്കാനാകൂ. ഒരു താക്കോൽ ഉപയോ​ഗിച്ചും വീണ്ടും മറ്റൊരു താക്കോൽ ഉപയോ​ഗിച്ചും ലിവർ ഒരേ സമയം പ്രവ‍ർത്തിപ്പിച്ചുമാണ് ലോക്കർ തുറക്കാൻ സാധിക്കുക. ഈ രീതികൾ കൃത്യമായി പാലിച്ചാണ് ലോക്കർ തുറന്നിരിക്കുന്നത്.

വീടിനെക്കുറിച്ചും ലോക്കറിനെക്കുറിച്ചും കൃത്യമായി ധാരണയുള്ളവരാണ് കവർച്ചയ്ക്ക് പിന്നിലെന്നാണ് പോലീസ് സംഘത്തിന്റെ നി​ഗമനം. സ്വർണവും പണവും സൂക്ഷിച്ചിരുന്ന ലോക്കറിന്റെ താക്കോൽ മറ്റൊരു ഷെൽഫിൽ വച്ച് പൂട്ടിയിരുന്നു. ഈ ഷെൽഫിന്റെ താക്കോൽ മറ്റൊരിടത്താണ് സൂക്ഷിച്ചിരുന്നത്.

ഈ താക്കോൽ എടുത്താണ് ഷെൽഫ് തുറന്ന് അതിൽ നിന്ന് ലോക്കറിന്റെ താക്കോൽ എടുത്തിരിക്കുന്നത്. മരം കൊണ്ടുള്ള അലമാരയ്ക്ക് അകത്താണ് ലോക്കർ സ്ഥാപിച്ചിരിക്കുന്നത്. വീടിനെക്കുറിച്ചും മരത്തിന്റെ അലമാരയ്ക്ക് അകത്ത് സ്ഥാപിച്ചിരിക്കുന്ന ലോക്കറിനെക്കുറിച്ചും വ്യക്തമായ ധാരണയുള്ളവരാണ് കവർച്ചയ്ക്ക് പിന്നിലെന്നാണ് അന്വേഷണ സംഘത്തിന്റെ ​നി​ഗമനം.