Wayanad Student Death: ഡീനിനേയും അസിസ്റ്റന്റ് ഡീനിനേയും സസ്പെൻഡ് ചെയ്യും; നിർദേശം നൽകിയെന്ന് മന്ത്രി ജെ.ചിഞ്ചുറാണി

വയനാട്: പൂക്കോട് വെറ്ററിനറി കോളേജ് ഡീനിനെയും അസിസ്റ്റന്റ് ഡീനിനെയും സസ്പെൻഡ് ചെയ്യുമെന്ന് മന്ത്രി ജെ ചിഞ്ചുറാണി. പൂക്കോട് വെറ്ററിനറി കോളേജ് വിദ്യാർഥി സിദ്ധാർഥൻ മരിച്ച കേസിലാണ് നടപടി. ഇരുവർക്കുമെതിരെ നടപടി സ്വീകരിക്കാൻ പുതിയ വൈസ് ചാൻസിലറോട് വാക്കാൽ നിർദേശം നൽകിയതായി മന്ത്രി വ്യക്തമാക്കി.

ഡീനിനും അസിസ്റ്റന്റ് ഡീനിനും ആയിരുന്നു ഹോസ്റ്റൽ നോക്കേണ്ടതിന്റെ ചുമതല. ഇവരുടെ ഭാ​ഗത്ത് നിന്ന് വീഴ്ച സംഭവിച്ചു. ഇവരെ സസ്പെൻഡ് ചെയ്യാനിരിക്കെയാണ് ​ഗവർണർ നിലവിലെ വിസിയെ സസ്പെൻഡ് ചെയ്തത്. ​വൈസ് ചാൻസിലറെ പുറത്താക്കിയ ​ഗവർണറുടെ നടപടി യോജിക്കാൻ കഴിയുന്നതല്ലെന്ന് മന്ത്രി വ്യക്തമാക്കി.

തന്നോടെ വകുപ്പിനോടോ സർക്കാരിനോടോ ​ഗവർണർ അഭിപ്രായം തേടിയില്ലെന്നും തീരുമാനം അറിഞ്ഞത് മാധ്യമങ്ങളിലൂടെയാണെന്നും മന്ത്രി ജെ. ചിഞ്ചുറാണി വ്യക്തമാക്കി. ഡീൻ ആവശ്യമായ നടപടികൾ സ്വീകരിച്ചില്ലെന്നും കൃത്യമായി വിവരങ്ങൾ ധരിപ്പിച്ചില്ലെന്നും സസ്പെൻഡ് ചെയ്യപ്പെട്ട വിസി പ്രൊഫ. എംആർ ശശീന്ദ്രനാഥ് പറഞ്ഞിരുന്നു. ഡീനിന്റെ നേതൃത്വത്തിലുള്ള സംഘമാണ് ഹോസ്റ്റലിലെ ശുചിമുറിയിൽ തൂങ്ങിമരിച്ച നിലയിൽ കാണപ്പെട്ട സിദ്ധാർഥന്റെ മൃതദേഹം അഴിച്ചിറക്കിയതെന്ന് വൈസ് ചാൻസലർ പറഞ്ഞിരുന്നു.

അതേസമയം, മുഴുവൻ പ്രതികളെയും ഇന്ന് കോടതിയിൽ ഹാജരാക്കും. പ്രതിപ്പട്ടികയിൽ ഉൾപ്പെട്ട 18 പേരും ഇന്നലെയോടെ അറസ്റ്റിലായിരുന്നു. ആകെ 18 പ്രതികളാണ് പ്രതിപ്പട്ടികയിൽ ഉൾപ്പെട്ടിരുന്നത്. പ്രതികളെ കാമ്പസിലെത്തിച്ച് തെളിവെടുപ്പ് പൂര്‍ത്തിയാക്കാനാണ് പോലീസിന്റെ നീക്കം. മര്‍ദ്ദനം, തടഞ്ഞുവയ്ക്കല്‍, ആത്മഹത്യ പ്രേരണ എന്നീ കുറ്റങ്ങളാണ് ഇവർക്കെതിരെ ചുമത്തിയിരിക്കുന്നത്. സിദ്ധാര്‍ത്ഥന്‍ ക്രൂരമർദ്ദനത്തിന് ഇരയായെന്ന് ആന്റി റാഗിംഗ് സ്‌ക്വാഡിന്റെ റിപ്പോര്‍ട്ടിലും വ്യക്തമാക്കുന്നു.

കല്‍പ്പറ്റ കോടതിയില്‍ കീഴടങ്ങാന്‍ എത്തിയ മുഖ്യപ്രതിയായ സിന്‍ജോ ജോണ്‍സണെ പോലീസ് പിടികൂടിയതോടെയാണ് കേസിലെ മുഴുവൻ പ്രതികളും പിടിയിലായത്. സൗദ് റിഷാല്‍, അജയ് കുമാര്‍, കാശിനാഥന്‍, സിന്‍ജോ ജോണ്‍സണ്‍ എന്നിവര്‍ക്കായി പോലീസ് ലുക്ക് ഔട്ട് നോട്ടീസ് പുറത്തിറക്കിയിരുന്നു. ഫെബ്രുവരി 18ന് സിദ്ധാര്‍ത്ഥനെ ഹോസ്റ്റലിലെ ശുചിമുറിയിൽ മരിച്ച നിലയിൽ കണ്ടെത്തുകയായിരുന്നു.

എസ്എഫ്‌ഐ യൂണിറ്റ് സെക്രട്ടറി അമല്‍ ഇഹ്‌സാന്‍, കോളേജ് യൂണിയന്‍ പ്രസിഡന്റ് കെ അരുണ്‍ എന്നിവരും പോലീസ് പിടിയിലായവരിൽ ഉൾപ്പെടുന്നു. വിദ്യാർഥിയെ ഹോസ്റ്റലിലെ ശുചിമുറിയിൽ തൂങ്ങിമരിച്ച നിലയിൽ കണ്ടെത്തിയിട്ടും കോളേജ് അധികൃതരും പോലീസും അലംഭാവം കാണിച്ചെന്ന് രൂക്ഷ വിമർശനങ്ങൾ ഉയർന്നിരുന്നു.