Pappanji: ക്രിസ്മസ് അപ്പൂപ്പൻ തന്നെയോ പാപ്പാഞ്ഞി..? പുതുവർഷത്തെ വരവേൽക്കാൻ കൊച്ചിക്കാർ കത്തിക്കുന്ന പാപ്പാഞ്ഞിയാര്

പുതുവര്‍ഷത്തെ വരവേല്‍ക്കാനായി പാപ്പാഞ്ഞിയെ കത്തിക്കുന്നത് കൊച്ചിക്കാര്‍ക്ക് ഒരു ആചാരമാണ്. എന്നാല്‍ ശരിക്കും ഈ പാപ്പാഞ്ഞി ആരാണെന്ന് അറിയുമോ.. ക്രിസ്മസ് അപ്പൂപ്പനെയാണോ പാപ്പാഞ്ഞി എന്നു വിളിക്കുന്നത് ഇവര്‍ തമ്മില്‍ യഥാര്‍ത്ഥത്തില്‍ എന്തെങ്കിലും ബന്ധമുണ്ടോ എന്ന് നോക്കാം. കഴിഞ്ഞു പോകുന്ന വർഷത്തിന്റെ പ്രതീകമാണ് പാപ്പാഞ്ഞി. ഒരു വയോധികന്റെ രൂപത്തിലാണ് പപ്പാഞ്ഞിയെ ഒരുക്കുന്നത്. ഡിസംബറിന്റെ അവസാന ദിവസം അർധരാത്രിയിൽ ഈ പപ്പാഞ്ഞി രൂപങ്ങളെ എരിച്ചുകളയുന്നതോടെ ആ വർഷം അവസാനിച്ചു എന്നാണ് സങ്കൽപ്പം.

പുതുവർഷത്തെ വരവേൽക്കാൻ, പോയ വർഷത്തെ യാത്രയാക്കുന്ന ചടങ്ങാണ് ഈ പപ്പാഞ്ഞി കത്തിക്കൽ. 'പപ്പാഞ്ഞി’ എന്ന പോർച്ചുഗീസ് വാക്കിന് 'മുത്തച്ഛൻ', ‘വൃദ്ധൻ’ എന്നൊക്കെയാണ് അർത്ഥം. സാന്താക്ലോസ് അഥവാ ക്രിസ്തുമസ് അപ്പൂപ്പനെ ക്രിസ്തുമസ് പപ്പാഞ്ഞി എന്ന് ചിലയിടങ്ങളിൽ പ്രാദേശികമായി വിളിക്കാറുണ്ടെങ്കിലും പുതുവർഷ ആഘോഷങ്ങളോടനുബന്ധിച്ച് കത്തിക്കുന്ന പപ്പാഞ്ഞിയും സാന്താക്ലോസുമായി യഥാർത്ഥത്തിൽ ബന്ധമൊന്നുമില്ല.

കൊച്ചിയിൽ 1503 മുതൽ 1663 വരെ ഉണ്ടായിരുന്ന  പോർച്ചുഗീസുകാരുടെ ക്രിസ്തുമസ്-പുതുവത്സര ആഘോഷങ്ങളുടെ അവശേഷിപ്പുകളിൽനിന്നാണ് കൊച്ചിയിൽ പപ്പാഞ്ഞി കത്തിക്കൽ ചടങ്ങ് ഉണ്ടാകുന്നത്. ഇസ്രയേലുകാർ യവനപ്പടയെ തോൽപ്പിച്ച് തങ്ങളുടെ മണ്ണ് സ്വന്തമാക്കിയതിനെ അനുസ്മരിക്കുന്ന ഹാനൂക്ക പെരുന്നാളിന്റെ എട്ടാം ദിനം തോറ വായനയ്ക്കു ശേഷം യവന സൈന്യാധിപനായിരുന്ന ബാഗ്രിസിന്റെ കോലം കത്തിക്കും.

വൈക്കോൽ, ഉണങ്ങിയ പുല്ല് എന്നിവയാണ് കോലത്തിൽ ഉപയോഗിക്കുന്നത്. കോലം കത്തുമ്പോൾ ചെറിയ പൊട്ടിത്തെറികളും ശബ്ദവും ഉണ്ടാവുന്നതിനു വേണ്ടി ഇതിനുള്ളിൽ ഉപ്പുപരലും ഇലഞ്ഞിയിലകളും തിരുകികയറ്റും. ബാഗ്രിസിന്റെ കോലം കത്തിക്കൽ ആചാരത്തിൽ നിന്നു കടംകൊണ്ടാതാവാം കൊച്ചിയിലെ ഈ പപ്പാഞ്ഞിയെ കത്തിക്കൽ ചടങ്ങ്. പപ്പാഞ്ഞിയുടെ ഉള്ളിൽ തിരുകുന്നത് വെടിമരുന്നും ഗുണ്ടുകളുമാണ്. ഹാനൂക്കപെരുന്നാൾ പോലെ ക്രിസ്തുമസ് രാത്രി കഴിഞ്ഞ് എട്ടാം ദിവസം പുലർച്ചെയാണു പപ്പാഞ്ഞിയെ കത്തിക്കുന്ന ചടങ്ങും.