Wild Elephant: മൂന്നാർ ദേവികുളത്ത് ജനവാസ മേഖലയിൽ ഇറങ്ങി പടയപ്പ

ഇടുക്കി: മൂന്നാർ ദേവികുളത്ത് ജനവാസ മേഖലയിൽ ഇറങ്ങി കാട്ടുകൊമ്പൻ പടയപ്പ. ദേവികുളത്തെ ഡിഎഫ്ഒ ക്വാർട്ടേഴ്സിനും ഡിഎഫ്ഒ ബംഗ്ലാവിനും സമീപത്തുകൂടിയായിരുന്നു കാട്ടുകൊമ്പന്റെ യാത്ര. ദേശീയപാത മുറിച്ച് കടന്ന കാട്ടാന പ്രദേശത്ത് മറ്റ് നാശനഷ്ടങ്ങൾ ഒന്നും വരുത്തിയില്ല.

ഇന്ന് രാവിലെ ആറരയോടെയായിരുന്നു കാട്ടുകൊമ്പൻ പടയപ്പ ദേവികുളത്ത് ജനവാസ മേഖലയിൽ ഇറങ്ങിയത്. ദേവികുളത്തെ ഡിഎഫ്ഒ ക്വാർട്ടേഴ്സിനും ഡിഎഫ്ഒ ബംഗ്ലാവിനും സമീപത്തുകൂടിയാണ് ആന സഞ്ചരിച്ചത്. തുടർന്ന് ദേശീയപാത മുറിച്ച് കടന്ന് സബ് കളക്ടർ ബംഗ്ലാവിനരികിലേക്ക് എത്തി.

പ്രദേശത്ത് കാട്ടാന മറ്റ് നാശനഷ്ടങ്ങൾ ഒന്നും വരുത്തിയില്ല. കന്നിമല ടോപ്പ് ഡിവിഷൻ, ലാക്കാട് ഭാഗങ്ങളിലൂടെയായിരുന്നു കഴിഞ്ഞ ദിവസങ്ങളിൽ കാട്ടാന സഞ്ചരിച്ചിരുന്നത്. കാലിത്തൊഴുത്തുകൾക്ക് കേടുപാടുകൾ വരുത്തിയ കാട്ടുകൊമ്പൻ പശുക്കൾക്ക് നൽകാൻ സൂക്ഷിച്ചിരുന്ന പുല്ലും ഭക്ഷിച്ചിരുന്നു. കഴിഞ്ഞ കുറച്ച് നാളുകളായി പടയപ്പ മൂന്നാറിലെ ജനവാസ മേഖലകളിൽ പതിവായി ഇറങ്ങുന്നുണ്ട്. തീറ്റതേടി അലയുന്ന കാട്ടാനയെ ഉൾവനത്തിലേക്ക് തിരിച്ചയക്കണമെന്നാണ് നാട്ടുകാർ ആവശ്യപ്പെടുന്നത്.