Aaraattu OTT Release: മോഹൻലാലിൻറെ ആറാട്ട് ആമസോൺ പ്രൈമിൽ എത്തുന്നു?
ചിത്രത്തിന്റെ ഒടിടി റിലീസ് മാർച്ച് 20 ന് ഉണ്ടാകുമെന്നാണ് സൂചന.
Kochi : മോഹൻലാൽ ചിത്രം ആറാട്ട് ഉടൻ ആമസോൺ പ്രൈമിൽ എത്തുമെന്ന് റിപ്പോർട്ട്. ചിത്രത്തിന്റെ ഒടിടി റിലീസ് മാർച്ച് 20 ന് ഉണ്ടാകുമെന്നാണ് സൂചന. ചിത്രം തീയേറ്ററുകളിൽ വിജയകരമായി പ്രദർശനം തുടരുകയാണ്. ഈ വർഷത്തെ ഏറ്റവും മികച്ച ഓപ്പണിങ് കളക്ഷൻ ലഭിച്ച ചിത്രമാണ് ആറാട്ട്. റിപ്പോർട്ടുകൾ അനുസരിച്ച് ആറാട്ടിന്റെ ആദ്യ മൂന്ന് ദിവസത്തെ ഗ്രോസ് കളക്ഷൻ 17.80 കോടി രൂപയായിരുന്നു
2022 ഫെബ്രുവരി 18 നായിരുന്നു ചിത്രം റിലീസ് ചെയ്തത്. ലോകത്തെമ്പാടുമായി 2700 സ്‌ക്രീനുകളിലായിരുന്നു ചിത്രം റിലീസ് ചെയ്തത്. ചിത്രത്തിൽ ആറാട്ട് ഗോപൻ എന്ന കഥാപാത്രമായി ആണ് മോഹൻലാൽ എത്തിയത്. ബി.ഉണ്ണികൃഷ്ണനാണ് ചിത്രം സംവിധാനം ചെയ്തത്. രണ്ട് ദശകങ്ങൾക്ക് ശേഷം എ.ആർ റഹ്മാൻ സംഗീതം നൽകിയ മലയാളം സിനിമ കൂടിയാണ് ആറാട്ട്. കോമഡിയും ആക്ഷൻ ത്രില്ലർ വിഭാഗത്തിലുമായി പെടുന്ന ഒരു ചിത്രമാണ് ആറാട്ട്.
പുലിമുരുകന് ശേഷം ഉദയകൃഷ്ണയും വില്ലന് ശേഷം ബി ഉണ്ണികൃഷ്ണനും മോഹന്‍ലാലിനൊപ്പം വീണ്ടും കൈകോര്‍ത്ത ചിത്രമായിരുന്നു "നെയ്യാറ്റിന്‍കര ഗോപന്‍റെ ആറാട്ട്". 18 കോടി രൂപയാണ് ചിത്രത്തിൻറെ ബജറ്റ് . നെടുമുടി വേണു, സായ് കുമാര്‍, സിദ്ദിഖ്, വിജയരാഘവന്‍, ജോണി ആന്റണി, ഇന്ദ്രന്‍സ്, രാഘവന്‍, ഷീല, സ്വാസിക, തുടങ്ങി നിരവധി താരങ്ങള്‍ ചിത്രത്തിൽ അഭിനയിച്ചിട്ടുണ്ട്.
ചിത്രത്തിൻറെ വൻ വിജയത്തെ തുടർന്ന് സക്‌സസ് ടീസർ പുറത്ത് വിട്ടിരുന്നു. മോഹൻലാലാണ് ടീസർ സാമൂഹിക മാധ്യമങ്ങളിലൂടെ പങ്ക് വെച്ചത്. സൈന മൂവീസിന്റെ യൂട്യൂബ് ചാനലിലൂടെയാണ് 41 സെക്കന്റുള്ള വീഡിയോ പുറത്ത് വിട്ടത്. ചിത്രത്തിലെ ഗാനങ്ങളും, ഡയലോഗുകളും കോർത്തിണക്കിയാണ് സക്‌സസ് ടീസർ തയ്യാറാക്കിയിരിക്കുന്നത്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...