Hema Commission report: `ഒറ്റപ്പെട്ട സംഭവമെന്ന് പറഞ്ഞ് ഒഴിഞ്ഞുമാറാനാകില്ല, വേട്ടക്കാരുടെ പേരുകൾ പുറത്ത് വരണം`; ഹേമ കമ്മിറ്റി റിപ്പോർട്ടിൽ നടൻ ജ​ഗദീഷ്

കൊച്ചി: ഹേമ കമ്മിറ്റി റിപ്പോർട്ടിൽ സമ​ഗ്രമായ അന്വേഷണം വേണമെന്ന് അമ്മ വൈസ് പ്രസിഡന്റും നടനുമായ ജ​ഗദീഷ്. അമ്മ ജനറൽ സെക്രട്ടറി സിദ്ദിഖിന്റെ അഭിപ്രായങ്ങളെ തള്ളിയാണ് ജ​ഗദീഷ് രം​ഗത്തെത്തിയത്. അന്വേഷണത്തിൽ നിന്ന് അമ്മ സംഘടനയ്ക്കോ പ്രൊഡ്യൂസേഴ്സ് അസോസിയേഷനോ ഒഴിഞ്ഞുമാറാൻ ആകില്ല. വേട്ടക്കാരുടെ പേര് എന്തിന് റിപ്പോർട്ടിൽ നിന്ന് ഒഴിവാക്കിയെന്നും ജ​ഗദീഷ് ചോദിച്ചു. ഹേമ കമ്മിറ്റി റിപ്പോർട്ടിനെക്കുറിച്ച് മാധ്യമങ്ങളോട് പ്രതികരിക്കുകയായിരുന്നു അദ്ദേഹം.

റിപ്പോർട്ടിൽ വാതിലിൽ മുട്ടി എന്ന് പറഞ്ഞിട്ടുണ്ടെങ്കിൽ എവിടെ വാതിലിൽ മുട്ടി എന്ന മറുചോദ്യത്തിന്റെ ആവശ്യമില്ലെന്നും ആർട്ടിസ്റ്റ് അങ്ങനെ പറഞ്ഞിട്ടുണ്ടെങ്കിൽ അതിനെക്കുറിച്ച് അന്വേഷിക്കണമെന്നും ജ​ഗദീഷ് പറഞ്ഞു. പരാതി പരിഹരിക്കപ്പെടണം. ഒറ്റപ്പെട്ട സംഭവമാണെന്ന് പറഞ്ഞ് ഒഴിഞ്ഞുമാറുന്നത് ശരിയായ നടപടിയല്ല. കുറ്റക്കാർക്ക് മാതൃകാപരമായ ശിക്ഷ നൽകണമെന്നും ജ​ഗദീഷ് പറഞ്ഞു.

മറ്റ് തൊഴിലിടങ്ങളിൽ ഇത്തരത്തിൽ നടന്നിട്ടില്ലേയെന്ന ചോദ്യം അപ്രസക്തമാണെന്നും അത്തരത്തിലൊരു ചോദ്യം പരിഷ്കൃത സമൂഹത്തിന് ചേർന്നതല്ലെന്നും ജ​ഗദീഷ് പറഞ്ഞു. നഷ്ടപ്പെട്ടുവെന്ന് പറയുന്ന അഞ്ച് പേജുകൾ എങ്ങനെ ഒഴിവായി. ഇക്കാര്യത്തിൽ സർക്കാർ വിശദീകരണം നൽകേണ്ടി വരും. സിനിമയ്ക്കുള്ളിൽ പുഴുക്കുത്തുകളുണ്ടെങ്കിൽ അത് പുറത്ത് കൊണ്ടുവരണം. അതിന്റെ ഉത്തരവാദിത്തം അമ്മ ഏറ്റെടുക്കണമെന്നാണ് അഭിപ്രായമെന്നും ജ​ഗദീഷ് പറഞ്ഞു.

ഇരയുടെ പേര് പുറത്ത് വിടേണ്ടതില്ലെങ്കിലും അക്രമിയുടെ പേര് പുറത്ത് വരണം. ഇക്കാര്യങ്ങളിൽ ഹൈക്കോടതിയാണ് നടപടിയെടുക്കേണ്ടത്. കോടതി പറയുന്ന ആൾക്കെതിരെ നടപടിയെടുക്കാൻ അമ്മ തയ്യാറാകുമെന്നും ജ​ഗദീഷ് പറഞ്ഞു. ഡബ്ല്യുസിസി അം​ഗങ്ങൾ ശത്രുക്കളല്ല, അവർ ഉന്നയിച്ചിട്ടുള്ളത് ന്യായമായ കാര്യങ്ങളാണ്. അമ്മ പിളർന്നല്ല ഡബ്ല്യുസിസി ഉണ്ടായതെന്നും അമ്മയിൽ ന്യായം കിട്ടാത്തതിനാലല്ല ഡബ്ല്യുസിസി രൂപീകരിച്ചതെന്നും ജ​ഗദീഷ് പറഞ്ഞു.

മലയാള സിനിമാ രം​ഗത്ത് മാഫിയ ഉണ്ടെന്ന് വിശ്വസിക്കുന്നില്ല. വനിതകൾ ദുരനുഭവങ്ങൾ ഉണ്ടായതായി പറയുമ്പോൾ എന്തുകൊണ്ട് നേരത്തെ പറഞ്ഞിട്ടില്ലെന്ന് ചോദിക്കാൻ താൻ ആളല്ല. വിജയിച്ചുവന്ന നടീ നടന്മാർ വഴിവിട്ട ബന്ധത്തിലൂടെയാണ് മുന്നേറിയതെന്ന് ഹേമ കമ്മിറ്റി റിപ്പോർട്ടിൽ പറഞ്ഞിട്ടില്ലെന്നും ജ​ഗദീഷ് പറഞ്ഞു.