ARM Box Office Collection: ട്രിപ്പിൾ റോളിലെത്തി എത്ര നേടി? ബോക്സ് ഓഫീസ് തൂക്കിയോ `എആർഎം`?

ടൊവിനോ തോമസിന്റെ ഏറ്റവും പുതിയ പാൻ ഇന്ത്യൻ ചിത്രം 'അജയന്റെ രണ്ടാം മോഷണം' ആദ്യ ദിനം ഡീസന്റ് ആയിട്ടുള്ള കളക്ഷൻ നേടിയെന്നാണ് റിപ്പോർട്ട്. ടൊവിനോയുടെ അമ്പതാമത്തെ ചിത്രമാണിത്. നവാ​ഗതനായ ജിതിൻ ലാൽ സംവിധാനം ചെയ്ത ചിത്രത്തിൽ ടൊവിനോ ട്രിപ്പിൾ റോളിലാണ് എത്തിയിരിക്കുന്നത്. സെപ്റ്റംബർ 12ന് ഇറങ്ങിയ ചിത്രത്തിന് മികച്ച അഭിപ്രായമാണ് ലഭിക്കുന്നത്. ആദ്യ ദിനം തന്നെ 3.50 കോടി രൂപ ചിത്രം നേടിയെന്നാണ് പ്രമുഖ ട്രാക്കർമാരായ സാക്നിൽകിന്റെ കണക്കുകൾ സൂചിപ്പിക്കുന്നത്. 

ചിത്രത്തിൽ ശബ്ദ സാനിധ്യമായി മോഹൻലാലുമുണ്ട്. 'കോസ്മിക് വോയിസി'ലൂടെയാണ് മോഹൻലാൽ ചിത്രത്തിൽ സർപ്രൈസ് എൻട്രി നടത്തിയിരിക്കുന്നത്. ഫെയ്സ്ബുക്ക് പോസ്റ്റിലൂടെയാണ് ടൊവിനോ ഇക്കാര്യം ആരാധകരെ അറിയിച്ചത്. 

മോഹൻലാലിനെ കൂടാതെ കോസ്മിക് വോയിസ് ആയി വിക്രം, ഡോ. ശിവരാജ് കുമാർ എന്നിവരും സിനിമയുടെ ഭാ​ഗമാകുന്നുണ്ട്. മലയാളത്തിന് പുറമേ തമിഴ്, തെലുങ്ക്, കന്നട, ഹിന്ദി എന്നീ ഭാഷകളിലും 3Dയിലും ചിത്രം റിലീസ് ചെയ്തു. രണ്ട് മണിക്കൂർ 28 മിനിറ്റാണ് ചിത്രത്തിന്റെ ദൈർഘ്യം.

മൂന്ന് കാലഘട്ടങ്ങളുടെ കഥ പറയുന്ന അജയന്റെ രണ്ടാം മോഷണം ജിക് ഫ്രെയിംസ്, യു.ജി.എം മോഷൻ പിക്ചേഴ്സ് എന്നീ ബാനറുകളിൽ ലിസ്റ്റിൻ സ്റ്റീഫൻ, ഡോ. സക്കറിയ തോമസ് എന്നിവർ ചേർന്നാണ് നിർമ്മിക്കുന്നത്. കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി എന്നിവരാണ് ചിത്രത്തിൽ നായികമാരായി എത്തുന്നത്. തെലുങ്ക് ചിത്രങ്ങളിലൂടെ പ്രശസ്തി നേടിയ കൃതി ഷെട്ടിയുടെ ആദ്യ മലയാളം സിനിമയാണ് 'ARM'.