Lucky Baskhar Movie : സീതാരാമത്തിന് ശേഷം ദുൽഖർ വീണ്ടും തെലുങ്കിൽ; ലക്കി ഭാസ്കർ സിനിമയുടെ ഫസ്റ്റ്ലുക്ക് പുറത്ത്

തെലുങ്ക് സൂപ്പർ ഹിറ്റ് ചിത്രമായ സീതാരാമത്തിന്റെ ദുൽഖർ സൽമാന്റെ പുതിയ ടോളിവുഡ് സിനിമയാണ് ലക്കി ഭാസ്ക്കർ. ചിത്രത്തിന്റെ ഫസ്റ്റ്ലുക്ക് പുറത്ത് വിട്ടു. ദുൽഖറിന്റെ രണ്ട് വ്യത്യസ്ത ലുക്കാണ് ഫസ്റ്റ്ലുക്കിലൂടെ അവതരിപ്പിച്ചിരിക്കുന്നത്. ഒരു ബാങ്ക് ഉദ്യോഗസ്ഥന്റെ വേഷത്തിലാകും ലക്കി ഭാസ്ക്കറിൽ ദുൽഖർ എത്തുക എന്ന സൂചനയാണ് ഫസ്റ്റ്ലുക്കിൽ നിന്നും ലഭിക്കുന്നത്. ദുൽഖറിന്റെ സിനിമ കരിയർ ആരംഭിച്ച 12 വർഷം തികയ്ക്കുന്ന വേളയിലാണ് അണിയറപ്രവർത്തകർ ചിത്രത്തിന്റെ ഫസ്റ്റ്ലുക്ക് പുറത്ത് വിട്ടിരിക്കുന്നത്.

തമിഴ് ചിത്രം വാത്തി ഒരുക്കിയ വെങ്കി അട്ലുറിയാണ് ചിത്രത്തിന്റെ സംവിധായകൻ. വെങ്കി അട്ലുറി തന്നെയാണ് ലക്കി ഭാസ്ക്കറിന്റെ രചനയും നിർവഹിച്ചിരിക്കുന്നത്. സിത്താര എന്റർടെയ്മെന്റ്സ്, ശ്രീകാർ സ്റ്റുഡിയോസ്, ഫോർച്ച്യൂൺ ഫോർ എന്നീ ബാനറുകളിൽ നാഗാ വംശിയും സായി സൗജന്യയും ചേർന്നാണ് ചിത്രം നിർമിക്കുന്നത്. ദുൽഖറിന്റെ കരിയറിലെ മൂന്നാമത്തെ തെലുങ്ക് ചിത്രമാണ് ലക്കി ഭാസ്ക്കർ.

മഗധ ബാങ്കിൽ ജോലി ചെയ്യുന്ന ബാങ്ക് കാഷ്യറുടെ വേഷത്തിൽ ദുൽഖർ പ്രത്യക്ഷപ്പെടുന്ന ഈ ചിത്രം 90-കളിലെ ബോംബെയിലെ സാമ്പത്തിക പ്രതിസന്ധിയുടെ സമയത്ത്, ഒരു കാഷ്യറുടെ ജീവിതം കടന്നുപോവുന്ന പ്രതിസന്ധികളെയാണ് ദൃശ്യാവിഷ്ക്കരിക്കുന്നത്. മീനാക്ഷി ചൗധരിയാണ് ചിത്രത്തിലെ നായിക.

ജിവി പ്രകാശാണ് ചിത്രത്തിലെ സംഗീതം ഒരുക്കുന്നത്. നിമിഷ് രവിയാണ് ഛായാഗ്രാഹകൻ. ബങ്ക്ലൻ, നവിൻ നൂളി പിആർഒ: ശബരി തുടങ്ങിയവരും അണിയറയിൽ അണിനിരിക്കുന്നു. തെലുങ്കിൽ ഒരുക്കുന്ന ചിത്രം മലയാളം, തമിഴ്, ഹിന്ദി ഭാഷകളിൽ മൊഴിമാറ്റി റിലീസ് ചെയ്യും. 

കഴിഞ്ഞ വർഷം തിയറ്ററുകളിൽ എത്തിയ കിങ് ഓഫ് കൊത്തയ്ക്ക് ശേഷം ദുൽഖറിന്റേതായി റിലീസിനായി ഒരുങ്ങുന്ന ചിത്രമാണ് ലക്കി ഭാസ്ക്കർ. ഈ ചിത്രത്തിന് ശേഷം മണിരത്നത്തിന്റെ കമൽ ഹാസൻ ചിത്രം തഗ് ലൈഫിലും ദുൽഖർ പ്രധാനവേഷത്തിൽ എത്തും.